VC Draft Roll tarchhuak dawn

Mizoram-a Village Council 16-a by-election neih tur atan Vawiin hian Electoral Roll ennawn hna thawh tan a ni dawn a, heng VC 16 zingah hian Serchhip-a Village Council pahnih a tel a ni.
State Election Commission, Mizoram in ruahmanna a siam angin heng VC 16-ah te hian kumin July 1-a kum 18 tling chin te lain Electoral Roll ennawn hna hi kalpui a ni dawn a, Vawiin July 24, 2024 hian Draft Electoral Roll tarchhuakin thun thar, paih leh siamthat ngai te tan tun thla ni 25 atanga 31 chhungin dilna thehluh theih a ni anga, heng te hi August 1 atanga ni 8 chhunga enfelin Final Electoral Roll chu August 13, 2024-ah tarchhuah tur a ni ang.

Tun tuma VC By-election neihna tura ruahman zingah hian Serchhip District atangin Serchhip-III (Chhim Veng) leh New Serchhip North-a VC seat pakhat ve ve telin heng te hi General Seat a ni a. Champhai District-ah VC 5, Kolasib leh Khawzawl-a VC pahnih ve ve leh Aizawl, Lunglei, Mamit, Saitual leh Hnahthial-a VC pakhat theuh ah by-election hi neih bawk tur niin a vaiin VC seat 23-ah by-election hi neih a ni dawn a, heng zinga Seat 5 chu hmeichhia te tana Seat hauh niin VC 5-ah te chuan VC thar din turin by-election hi neih tur a ni ang.