India Act East Policy atana mellung pawimawh tak a nih thu sawi

Union Minister of Information and Broadcasting Aswini Vaishnaw chuan IIMC Aizawl-a Apna Radio Station din thar chu India Act East Policy atana mellung pawimawh tak a nih thu a sawi.

Ramchhunga Community Radio Station 500-na tur IIMC Aizawl-a Apna Radio 90.0 FM biakhmuhtheihna kaltlanga nimin-a a hawnna ah he thu hi sawiin Union Minister chuan mipuite tana chhawpchhuah Community Radio hawn thar a lo ni chu lawmawm a tih thu a sawi a, mipui nunphung thlakin a tha zawnga khawtlang nun a herrem a beisei tih a sawi a, tun tuma hawn thar tak chuan India Act East Policy ah mellung pawimawh tak a phun tih a sawi a ni. Aswini Vaishnaw chuan hmarchhak State tan Union Budget hnuaia hmasawnna tur chhawpchhuah tam tak zingah Rel kawnga hmasawnna a tel thu pawh sawiin, hei hian inkalpawhna tha zawk a thlen dawn tih a sawi a, hun rei tak chhunga mipuiten an lo nghah tawh chu a takin a thleng dawn tih a sawi bawk.

He hunah hian Union Minister of State Dr. L. Murugan chuan Apna Radio Station chu mipuiten hlawkna an hmuh ngei theih nan tangkai taka hman a pawimawh thu a sawi a, khuarel chhiatna a thlen lai leh hun dangah te an mawhphurhna hriaa khawtlang tana tangkai taka thawk turin a chah a ni.