MZP in July 31, 2024 hnuah na taka hmalak an rel

Mizo Zirlai Pawl (MZP) General Hqrs. chuan July 31, 2024 ralhma ngeia Zirlai ten a thlawna lehkhabu an dawn tur an dawng kim lo a nih chuan na taka hmalak nise an ti.

MZP General Hqrs. hian nimin khan Aizawl-a MZP Conference Hall-ah Executive Committee Meeting neiin June 3, 2024-a Zirlaibu a thlawna sem tur la sem zawh loh chungchanga hmalak an lo rel tawh chung-chang chu an sawiho a. Hemi kawnga hmalakna kal zelah RTI hmangin School 1270 ten an la dawnglo tih hmuhchhuah a nih thu leh Printing & Stationery changtu Minister F. Rodingliana chu a Pisa-ah hmuin Education Department changtu Minister pawh sawipui tura hmuh tum niin, hmuh theih a ni lo leh chinfel dan kawng zawng vat lo a sawrkar hmasa dem zawng ringawt a tawngkam a nei chu hriatthiam har an tih thu an sawi a. July 31, 2024 ralhma ngeia zirlaite chanvo, a thlawna lehkhabu dawn tur an la dawng kimlo a nih chuan na taka hmalak nise an ti a ni.

MZP Executive Committee Meeting hian MZP Rorelna sang ber, Assembly vawi 68-na chu September 24-26, 2024 chhung khian Tlangsam khua, Chnamphai District-ah neih nise an ti a. MZP chhungkua, Hnampual hruaitu, College SU Leaders, MZU Students’ Council leh Students’ Bar Council hruaitute hlawhtlinna changte lawm-puina hun August 6, 2024 khian hman nise an ti bawk.

MZP hruaitute chuan nimin vek khan Supply Minister B. Lalchhanzova an hmuh thu pawh sawiin, Myanmar, Manipur leh Bangla-desh-a kan unau  raltlan mi 45,000 chuang tana buhfai an dawn theihna tur central atanga cheng vbc. 5 an dawn thu a lo sawi thu an sawi a. MZP hruaitute chuan kan unau raltlan ngaihtuahtu sawrkar chungah lawmthu an sawi tih thuchhuah siamin an tarlang bawk a ni.