Serchhip District-a VC by-election neihna turah Draft Electoral Roll tarchhuah a ni
Serchhip Chhim Veng Village Council leh New Serchhip North Village Council-a by-election neih tur inbuatsaihna atana Draft Electoral Roll hi nimin khan Serchhip District Bawrhsap leh District Election Officer Paul L. Khuma chuan Serchhip DC Meeting Hall-ah tlangzarhin, Serchhip District-a Village Council pahnih-ah by-election hi neih a nih dawn thu leh heng VC pahnih te hi VC dinglai an boral avanga Seat ruak a ni tih a sawi a. Electoral Roll ennawn hna thawh tur leh by-election neih tura mawhphurhna nei te chu mahni hna theuh ah theihtawp chhuah turin a chah bawk a ni.
District Bawrhsap chuan Draft Roll tarchhuah tak dinhmun tlangpui sawiin, Chhim Veng Village Council leh New Serchhip North Village Council-ah hian Seat 5 ve ve awmin General Seat 4 leh Reserve Seat pakhat an nei a. Heng VC pahnih ah hian General Seat pakhat ve ve ruakin heng Seat ruak pakhat hnawhkhahna atan hian By-election hi neih a ni dawn a. Draft Electoral Roll tarchhuah atanga a lan danin Chhim Veng Village Council huamchhungah hian In 257 awmin Vote nei mipa 422 leh hmeichhia 432, an vaiin 854 an awm a, Polling Station pakhat awmin New Serchhip North Village Council-ah hian In 479 awmin Vote nei mipa 778 leh hmeichhia 835, an vaiin 1613 an awm bawk a, Polling Station pathum a awm thung a ni.
Serchhip Election Officer Gaston Vanlalhriatpuia chuan kumin July 1-a kum 18 tling chin (July 1, 2006 leh a hmalam a piang) te tan hming thun belh theih a nih dawn bakah hming paih leh siamthat ngai te tan Form 3, 4 leh 5 hmanga dil tur a nih thu a sawi a. Dilna hi Serchhip Chhim Veng leh New Serchhip North-a VLO hnen atangin Vawiin, July 25, 2024 atanga July 31, 2024 thlengin lachhuaka thehluh theih a ni anga, heng dilna te hi August 1, 2024 atanga August 8, 2024 chhungin ERO leh AERO ten chingfelin August 13, 2024-ah Final Electoral Roll chu tarchhuah a ni anga, State Election Commission in inthlanna neih hun tur chu ala rawn ruahman tur thu a sawi bawk a ni.
Serchhip District-ah hian tun dinhmunah Village Council 54 awmin 26-Serchhip (ST) AC-ah VC 20; 27-Tuikum (ST) AC-ah VC 18 leh 28-Hrangturzo (ST) AC-ah VC 16 te an ni a. Serchhip District chhunga VC Seat tamna ber chu Thenzawl East VC niin Seat 9 a awm a, Vote nei thei 3189 an awm a, VC Area pakhat a Vote nei tlemna ber chu Vanchengte VC neiin Vote nei mi 86 an awm a, VC Seat 3 an nei bawk a ni.
Comments
Post a Comment