Lawngtlai DC in Zorinpui atanga Paletwa kawng laih mek a hmunah a tlawh

Lawngtlai District Bawrhsap Cheemala Siva Gopal Redd chuan Zirtawpni khan Mizoram chhimtawp-a awm Zorinpui tlawhin Zorinpui atanga Paletwa kawngpui laih hna thawk mek enkawltu IRCON International Ltd. hmalakna leh hnathawh chinte a hmunah a enfiah.

Lawngtlai DC chuan Kaladan Multi Modal Transit Transport Project (KMMTTP) in Mizoram tana hmasawnna rahbi thar a thlen tur chu a taka hmuh a chakawm tawh hle tih sawiin, he kawngpui hi zawhfel a nih chuan sumdawnna lian zawk kalpui niin, Lawngtlai bakah Mizoram hmun hrang hranga chengte tan hamthatna tam tak a thlen dawn a, chhungkaw tam tak tan eizawnna tha tak a siam dawn a ni, a ti bawk.

Zorinpui atanga Paletwa inkar kawngpui hi 'Two Lane' tur niin July 7, 2022 khan IRCON International Ltd. (Ministry of External Affairs) chuan hna an tan a, January 6, 2026-ah zawhfel tura ruahman a ni a. He kawng hi KM 109.2-a thui niin Culverts, Major & Minor Bridges, Bus Bay & Bus Shelter leh Truck Lay Bye-te siam a ni dawn a. IRCON International Ltd. hian he kawng laih hna hi enkawl mekin an hnuaiah hian Contractor 11 an awm mek a, tun dinhmunah Fur ruahtui tlak tam lai anih avangin hnathawh a chak thei lo hle tih Bawrhsap hi lo hrilhin, Myanmar lama thuneihna kengkawh mektu, United League of Arakan (ULA) te nen thawhhona tha tak an neih thu an lo sawi a ni. Lawngtlai DC hian Bungtlang South BDO Office a tlawh nghal bawk a ni.