KVK Serchhip District te hmalakna in Badam chinna hmun ah Field Day hman a ni
Sawrkar laipui Programme (100 days Action Plan) hnuaiah hriak pai thlai chin kawnga KVK Serchhip ten hma an lak mekna zinga thlai pakhat Badam (Grountnut) an chinna hmuna Field Day an hman ah hian KVK Serchhip District-a Senior Scientist & Head Dr. T. Vanlalngurzauva chuan Mizoram-in hriak lama tan kan lak kan mamawh thu leh intodelh thei kan nihna te, intodelh tura thlai chi (variety) thlan kawnga uluk a tul thu te sawiin, an hun hman hlawk taka hmang tur leh hriat duh an neih ang ang te inthlahrung lova zawt turin a fuih a ni.
He hunah hian Kenny Zohmingliana, Subject Matter Specialist (Agronomy) chuan thlai hriak pai (Oilseed crops) ah intodelh theihna kawng zau tak a awm thu tarlangin, KVK Serchhip District te hian Badam chi tha pahnih, Visishta (TCGS 1694) leh TAG-73 an kalpui mek thu a sawi a, Hectare khat-ah TCGS 1694 hian badam (pod yield) Fur laia chin in kg. 2489 leh Thlasik-a chinin kg. 2495 lai a thar theih thu leh a Oil content hi 50% lai anih theih thu a sawi a. TAG-73 hian Badam natna Tikka disease an tih leh Collar Rot leh Stem Rot te engemaw chen a do theih thu te, nipui laia chinin Hectare khat-ah Badam kg. 2500-2800 thleng thar theih anih thu leh a hriak pai pawh 49% anih thu te a sawi a. Heng Badam chi hnih te hi eizawnna tlak (commercial potential) nei tha anih thu sawiin, KVK ten hma an lakna turah theihtawpa an lo inzirna te zirchianna an lo neih tawh te a sawi bawk.
KVK-a Subject Matter Specialist (Home Science) K. Lalmalsawmi pawhin hlawhtling tur chuan Badam chi hmuh ang ang ching ngawt lova, a chi tha leh hriak pai tam mai bakah kan sik leh sa mila zirchian tawh te, rannung leh natna laka fihlim tha chauh thlan thiam a tul thu te a sawi a, Badam hriak mai bakah Badam atanga sumdawnna awm thei (value added products) te sawiin, nasa zawka Badam chin kan uar chhoh zel a pawimawh thu a sawi bawk .
Inkawmhona hun hman anih hnu hian KVK Demonstration Plot-a Badam chin enhona leh an hriat duh ang ang inhrilhna hun hman chhunzawm nghal a ni a, he hunah hian North Vanlaiphai khuaa Badam chingtu mi 30 vel an tel a. KVK Serchhip District hotute chuan tun dinhmunah KVK Serchhip hmalakna hnuaiah khaw 6-ah Badam chingtu mi 70 vel an awm mek tih an sawi a. Sawhthing chinga hmala mek zinga Sawhthing tam avanga buaina tawk mek te pawh Sawhthing avanga hlawhchhamna an tawh palh hlauin an Sawhthing hmunah Badam chin pawlh an awm niin an sawi bawk a. Agriculture Department pawhin kuthnathawktu tanpuina atan KVK-ah hian hriak pai thlai chingtute mamawh phuhrukna turin hriak herna khawl a bunsak tih an sawi a ni.
Comments
Post a Comment