Ek Ped Ma Ka Naam and Plant4Mother Campaign pualin Sakawrhmuituai Tlang-ah thingtiak 50 phun

Nimin khan Nu pual thing pakhat phun beihpui thlakna, 'Ek Ped Ma Ka Naam and Plant4Mother Campaign' chu Sakawrhmuituai Tlang-ah neih a ni a, Social Welfare, Tribal Affairs, Women & Child Development Minister Lalrinpuii chuan a telpui a ni.

Women & Child Development leh Environment, Forest and Climate Change Department buatsaiha he hun hman ah hian Minister Lalrinpuii chuan nute puala thingphun beihpuithlakna buatsaihtu leh hemi puala kalkhawmte hmalakna fakawm a tih thu sawiin, he Campaign hi tunlai khawvel sik leh sa inthlak danglam zel dolet kawnga hmalakna pawimawh tak a ni tih a sawi a, ramngaw chereu zel avanga harsatna a thlen loh nan thingphun kan uar deuh deuh a pawimawh a, hei hi kan tu leh fate tana kan mawhphurhna leh hmalakna tur a ni, a ti a. He Campaign chuan thingphun uar kawngah rah tha a chhuah ngei a beisei thu sawiin, Sakawrhmuituai Tlang chu Swadesh Darshan kaltlanga cheithat tum a nih thu a sawi bawk.

Minister Lalrinpuii chuan thing leh maute chu boruak tha min petu an nih mai bakah tunlai khawvela kan buaina lian ber boruak lum chho zel venna atana pawimawh ber an nih thu tarlangin, leilung luangral tur vengtu tha tak a nih thu leh khuarel chhiatna tam tak laka min veng theitu a nih thu te a sawi a. He hun hman ruala pawimawh leh mamawh ni a lang chu mipuite thinlungah thingphun pawimawhna nghet taka tuh a nih thu sawiin, hemi tur hian mi thahnemngaite bakah sawrkar leh tlawmngai pawlte kan tanrual a tul thu a sawi bawk.

He hun kaihruaitu Lalzarmawii IAS, Commissioner & Secretary, Social Welfare, Tribal Affairs, Women & Child Development Department chuan Sawrkar laipui Ministry of Environment, Forest & Climate Change bultumin thingphun beihpui 'Ek Ped Ma Ke Naam and Plant4Mother' tih thupui hmanga neih mek a nih thu leh hemi behchhan hian Ministry of Women & Child Development Department pawhin hma a lak thu a tarlang a. Global warming avangin sik leh sa danglam nasat tawh thu sawiin, India rama sik leh sa nuam bera ngaih Mizoram-ah thal a lo nih chuan India ram hmun dangte ang bawkin a lum tawh hle tih a sawi a. Khawvel nuam zawk kan neih theih nan thingphun uar deuh deuh a pawimawh thu leh ramngaw humhalh a tul takzet thu a sawi a. Mizoram chhunga Anganwadi Centre tinah pawh thingphun tura hmalak chhoh mek a nih thu sawiin, kumin September chhung hian Anganwadi Centre tinah thing tiak pakhat tal phun hman vek tum a nih thu a sawi bawk.

Nimin-a Ek Ped Ma Ka Naam and Plant4Mother Campaign-ah hian Department hotute leh khawtlang hruaitute telin he beihpui thlakna pual hian thingtiak 50 an phun a ni.