Leilet neitute buhhum tharchhuah leisak kawnga hmalakna tur inhrilhhriatna hun hman a ni

Leilet neitute buhhum tharchhuah leisak kawnga hmalakna 'Paddy Procurement Programme' chungchanga pawimawhte inhrilhhriatna hun chu nimin khan Agriculture and Farmers Welfare Minister PC. Vanlalruata hovin neih a ni.

Agriculture and Farmers Welfare Department buatsaiha Directorate of Agriculture Conference Hall-a he hun hman ah hian Agriculture Minister PC. Vanlalruata chuan Mizoram Sawrkarin tunhnaiah Chief Minister kaihhruai 'The Mizoram State Government Paddy and Rice Procurement Committee' a din tih sawiin, hemi hnuaia din Task Force in loneitu atangin buhhum leh buhfai leisak theih a ni em tih a zirchiang dawn tih a sawi a. Sawrkarin Support Price siamin thlai pali lei tura ruahmanna a kalpui thu sawiin, hemi bakah hian Buhhum lei turin zirchianna kalpui mek a nih thu a sawi a. Khawl hmanga hnathawh, Farm Mechanisation kan kalpui uar deuh deuh a ngai tih sawiin, Sawrkar pawhin hemi kawngah hian mamawh dan a zirin ruahmanna a siam zel dawn a ni, a ti bawk.

Agriculture and Farmers Welfare Minister chuan Mizoram-ah buh leh thlai chinna tur hmunhma tha tak tak Vvawiin thlenga la hman tangkai loh engemawzat a awm thu sawiin, “Tuna kan hman tangkai mek bakah hengte hi kan cheibawla kan hman tangkai phawt chuan kan eikhawp mai bakah thawnchhuah tur thlengin kan thar thei dawn a ni,” a ti a. State pawn atanga buh leh thlai lalut reng lova mahni tharchhuah hmanga intodelh tuma hmalak a pawimawh thu sawiin, mahni kutke a ding thei turin Agriculture Sector bikah ram leh hnam hmangaihna thinlung, Agricultural Nationalism pu chunga tanlak a tul thu a sawi a. Paddy procurement programme kalpui tura inpuahchahna kalpui chhoh mekah a hlawhtlinna hmuh a nih theih nan tanrual a pawimawh hle dawn tih a sawi bawk.

Agriculture and Farmers Welfare Department chuan Kolasib leh Mamit District-ah kumin-a leilet buh chinna hmun hactare 1280 a zau Survey a neih atangin Buhhum quintal 27194 tharchhuak turin a beisei a. District pahnih ah hian Buh chinna leilet zau (WRC cluster) 121 awmin leilet neitu 2252 lai awma chhut a ni a. Kum 2017-2018 ah khan Agriculture and Farmers Welfare Department chuan Special Programme for Establishment of Mini-Rice Mill chu State danga buh hralh a nih loh nan leh leilet neitute hamthatna turin a lo kalpui tawh a. Paddy Procurement Programme hlawhtlinna tur hian kumin July thla tir khan Mamit leh Kolasib District khaw hrang hrangah te Paddy Procurement Sensitization Drive kalpui niin Department hotute kaihhruaina hnuaiah Officer thahnem takin sawrkarin Buh tharchhuah man man zawka a lei tur chungchang inhrilhhriatna leh sawihona hun hman a lo ni tawh bawk a ni.