Ruihhlo do beihpui thlak dan tur sawihona nei

Excise & Narcotics Department changtu Minister Lalnghinglova Hmar hovin nimin khan Mamit-ah Ruihhlo Do beihpui thlaka thawhho dan tur sawiho a thutkhawm neih a ni.

He thutkhawm Mamit DC Conference Hall-a neih ah hian END Minister Lalnghinglova Hmar chuan Mamit District chu ramri a nih avangin ruihhlo kalka leh kawng pawimawh tak a nih thu a sawi a, Mamit District chhungah pawh ruihhlo ti engemawzat an awm tih hriat a nih thu sawiin, “Engtinnge kan ram leh hnam hmelma lian tak ruihhlo hi kan do ang a, a ti mekte engtin nge kan enkawl ang? A la ti ve lo te engtin nge kan ven ang tih chu ngaihtuahna tak tak senga kan vei tlan a ngai ta,” a ti a. “Mamit District-ah hian Sawrkar Department leh khawtlang anga hmalakna kalpui thin a ni a, Kohhran angin engtin nge hma kan lak ang tih Vawiin hian kan sawiho a tul a, kan hnaivai mai a ruihhlo ngaite tana ke kan pen lo a nih chuan thi mai turin kan kalsan tho a ni,” tiin Sawrkar Department, Khawtlang leh Kohhran te'n tihtak zeta ngaihtuahna senga hmala a, ke pen turin a sawm a. Sawrkar chuan ram leh hnam hmelma ruihhlo do hna chu a ngaipawimawh hle tih pawh sawiin, a theih ang anga thawktute thuamchakte, khawtlang leh Kohhran anga thawhhona kalpuite leh ruihhlo dona tura mamawh sum leh thildang ah pawh theihtawp a chhuah zel dawn thu a sawi bawk.

He thutkhawm hi Mamit DC Jacob Lalawmpuia chuan kaihruaiin hmalakna tur hrang hrang sawiho a ni a, Mamit khawpui chhunga Kohhran hrang hrang tangrualin ruihhlo ngaite khungkhawm a, enkawlna pekte, zirna School-ah karkhatah ni khat tal ruihhlo do tura zirtirna pek nise tihte chu hmalakna tur atan chhawpchhuah a ni.