Mizo ziakmite hi Mizo history chabi kawltute an ni - Dr. Vanlalthlana, Edn. Minister

School Education Minister Dr. Vanlalthlana chuan Mizo ziakmite chu Mizo history chabi kawltute an nih thu a sawi.

Mizo Writers Association (MWA) in ‘MWA Foundation Day 2024’ nimin-a Aizawl-a I&PR Auditorium-a an buatsaih a hmanpuina ah Dr. Vanlalthlana chuan thu leh hla in thil a tih theih zia te, khawtlang nun leh ram inrelbawl dan thlenga a nghawng thui theih zia sawiin, thalaite kawng dik kawhhmuh a, ram siam danglam tura thalaite kaihruaitu ah ziakmite chu a sawm a. Mizo ziakmite kutchhuak thu leh hla hlutna leh pawimawhna hrang hrang sawiin, heng thu leh hlate hi keini bak a hlut tu tur kan awm chuanglo tih a sawi a ni. Dr. Vanlalthlana chuan Zirlaite'n Mizo Literature tha awlsam zawka an hmuh theih a, College Library Mizo Literature Section changtlung tak a awm chu a ngaihpawimawh thu a sawiin, hemi atan hian Aizawl North College Library a dah turin MWA member te chu a tlem berah Rs. 20,000/- man Mizo ziakmite kutchhuak lo thlangkhawm turin a chah a. Chhunzawm zel tlak a nih dawn chuan hmalak zel theih dan tur te ruahman a nih theih tur thu a sawi bawk.

Mizo Writers Association (MWA) hi July ni 23, 1977-ah din niin kum 47 a upa a ni tawh a. A din tirh atangin MWA chuan Mizo tawng tihhmasawn nen leh Mizo thu leh hla tihhmasawn nan kawng hrang hrangin hma a la thin a. An hmalakna zingah Lehkhabu lehlin tta ber Lawmman hlan te, Mizo Proficiency Prize siam te, Thu leh Hla Kutpui buatsaih leh Lehkhabu Pho Runpui (LPR)/bookfest neih te a tel a ni.