NITI Aayog Governing Council thutkhawm ah Chief Minister in Mizoram mamawh a thlen

NITI Aayog Governing Council thutkhawm vawi 9-na chu Inrinni khan New Delhi-ah Prime Minister Narendra Modi kaihhruaiin neih a ni a, he thutkhawm ah hian Mizoram atangin Chief Minister Lalduhoma pawh telin Mizoram-ah ‘Viksit Bharat 2047’ a hlawhtlin theihna tur thil pawimawh hrang hrang a thlen.

He thutkhawm ah hian Chief Minister chuan, NITI Aayog in State Institution for Transformation of Mizoram atana tanpuina a pek avangin lawmthu a sawi a. 16th Finance Commission hnena Mizoram mamawh (proposal) an thehluh te chu Viksit Bharat 2047 a hlawhtlin theih nana thil pawimawh tak tak te an nih thu a sawi a. Mizoram chuan State dangte aiin hmasawnna kan kalpui tlai bik tih pawh sawiin, “Kan awmna a kilkhawr avangin nitin nun man leh hmasawnna hnathawhna man pawh a sang bik. Nimahsela midangte hnunga kal reng ringawt erawh kan tum hauh lo. Sustainable Development Goals tihhlawhtlinna lama kan kal chak dan hian State dangte umpha tura kan tumruhzia a tilang a ni,” a ti.

Tuna kan mamawh hmasa chu inkalpawhna kawng tha zawk leh tam zawk neih a ni tih Chief Minister chuan sawiin, “Mizoram Road density hi National avarage aiin a la hniam bik a ni,” a ti a, Zirna, hriselna, tui, power, faina leh administrative infrastructures indaihlohna pawh a la nasat thu leh Mizoram mipui zatve aia tam chu khawpuia cheng kan ni tih sawiin, “Khawpui fel fai leh leilung chhiatna laka him, State hmasawnna bulthut (growth centre) ni thei neih kan mamawh. Khawpui leh thingtlang mipuite lakluh inthlau lutuk tihbo nan te, hna thar tam zawk siam anih theih nan te Handholding Policy kan kalpui dawn a. Hemi atan hian central sawrkar hian Special Package-in min pui se kan duh hle,” a ti bawk.

India hmarchhak State te hian leilung awmdan vang leh Iinfrastructure lama kan la hniam vang te in Industry lian kan nei tlem tih pawh Chief Minister chuan sawiin, sum hnar kan tlachham bik tih a sawi a. “A bika kan harsatna te kan lo hmachhawnna tur; zalen zawka kan hman theih tur Fund awm thei se kan tangkaipui hle ang. Tin, 10% GBS hi Ministry tin hian inkaihhruaina mumal tak duang se, Central PSU te pawh hian an CSR Fund 10% vel tal hi hmarchhak state ah hmang thei se,” tiin rawtna a siam a. “Viksit Bharat tihlawhtling turin remna leh muanna neih a tul hmasaa, Mizoram chu International border pahnih karcheh; a thenawm rama harsatna thleng te vanga chim buai reng a ni a. Security Related Expenditure kan dawn a rem ta chiah lo anih pawhin central sawrkar hian Peace dividend tal min ngaihtuahsak se kan duh a ni,” a ti bawk.