Kumin June 3, 2024 atang khan Aizawl-ah Income Tax Office hawn a ni

Mizoram State Income Tax Officer Remthanga Gangte chuan Mizo mipuite tan Aizawl Income Tax Office chu kumin June ni 3 khan Bawngkawn Brigade hmunah hawn a nih thu sawiin, Tribal nih avanga sawrkar a thil tihfel ngai tifel si lova Income Tax pek loh rikngawt chu chhuanlam a tling pha lo tih a sawi.

Thuthar thehdarhtu thenkhat ten an kawmna ah Mizoram State Income Tax Officer Remthanga Gangte chuan Mizo mipuite tan Aizawl Income Tax Office chu kumin June ni 3 khan Bawngkawn Brigade hmunah hawn a nih thu sawiin, Sawrkar hnathawk Tribal ni lo ten Income Tax kim taka an pek theih nan Department tina DDO-te chu an pawimawh hle tih a sawi a. Hemi rual hian Income Tax pek ngailo te pawhin felfai taka Return File online hmanga tih a ngaih thu a sawi bawk a. Sawrkar laipui leh Mizoram Sawrkar hnuaia contract hna reng rengah Income Tax pe tur ten mumal taka an pek a pawimawh thu leh Tribal Contractor te tan pawh Income Tax an awl theihna atan sawrkarin document neih tul a tihte neih thlap a pawimawh bakah mumal taka Income Tax Office an dawr a pawimawh thu a sawi a, Mizoram chhunga contract hnathawk zinga Tax Deduction Source leh Income Tax Return tih ngai ten an ngaih pawimawh hle a tul thu a sawi bawk.

Mizoram State Income Tax Officer Remthanga Gangte chuan Mizoram chu India ram hmun dang ang bawk a sum leh pai lakluhna leh sumdawnna kawngah pawh a than nasat thu a sawi a, sawrkar laipui hmalakna avangin sum leh pai che vel pawh online hmang deuh vek a ni tawh a, vawi leh khata sum hlawm lian tak Bank Account kaltlanga thawn leh dawn chungchang thu ah pawh mipuite, a bik takin sumdawng lianten harsatna an tawh loh nan Income Tax Department an rawn vat a that thu a sawi bawk.

Income Tax Officer chuan Aizawl-a Income Tax Office chu Enforcement Department a nih loh thu leh Income Tax chungchanga mipuite puitu an nih thu a sawi a, Mizote chu Tribal an nih angin Income Tax chawi an ngaih lohna lai a thil tihfel ngaite hlamchhiah mai lova tihfel vat thin a pawimawh tih a sawi bawk.

Mizoram a sumdawng, a bik takin lirthei zuarten Tax Collected Source (TCS) an ngaih pawimawh a ngaih thu pawh sawiin, lirthei cheng nuai 10 man chinah TCS za a pakhat (1%) cut a nih thute leh document felfai lo a awm palh chuan za a panga (5%) lai cut a ngaih thu te pawh a sawi bawk a ni.