Adviser to Chief Minister in NHIDCL hotute a kawm

Adviser to Chief Minister (Technical) Er. Ginzalala chuan nimin khan NHIDCL hotute kawmin National Highway 306 leh NH 6-in a paltlang Vairengte leh Kolasib inkara 4-Lane kawngpui siam chungchang a sawipui.

Adviser to CM (Technical) Pisa-a an inkawmna ah hian he kawng siam hna chak zawka thawk turin NHIDCL chu a duh thu Adviser to Chief Minister chuan sawiin, NHIDCL lamin Forest Clearance leh harsatna dang an tawh chungchang an sawi pawh theihtawp a chhuahpui tur thu a sawi a. NHIDCL chu kawngpui siama hmasawnna hna an thawhna ah kan environment min dim sak hle tura a duh thu sawiin, a remchang lai laia leivung paih liam mai lova mumal taka a theih chin china Spoil Bank siam a tul thu leh chutianga hmalak dan tur te a sawipui bawk a. Spoil Bank siam hi leivung paihna mai ni lovin a hnu zelah mipui tana tangkai- Park siam zui nan te, Truck chawlhna atan te, kawngpui kual lutuk tur pawhngil nan te leh tangkaina dang tam tak a neih zui theih dan tur te NHIDCL hotute a hrilh a, chutiang taka hma la tur chuan a chah a ni.

Heng bakah hian thingtlang lama kawngpui an sialin kawngpuiin a paltlang khua te chu hun lo kal zel tura an khaw zauhna leh changkanna dang keng tel thei tura kawng zawn thiam a tul thu Technical Adviser to CM chuan NHIDCL hotute chu a hrilh bawk a. Hetianga hma la tur hian Mizoram Sawrkar chuan a beisei thu leh India leh Myanmar ramri hrula kawngpui pawimawh tak kal tur pawh chak zawka hma la a, hna tan vat nise a duh thu a chah a. NHIDCL hotuten pawhin Adviser to CM thurawn te chu tha an tih thu leh lo zawm ngei an tum tur thu an sawi a ni.