Kum 40 hnuah Ex-MNA te thubuai tihtawp a ni

Kum 40 zet hnuah Ex-Mizo National Army (Ex-MNA) Member mi pathum te thubuai neih chu tihfel a ni.

Nimin khan Ex-MNA hruaitute hian Aizawl Press Club-ah thuthar thehdarhtute kawmin an member mi pathum Sgt. Lalzarliana, Thenzawl; Pte. Biakhluna, Kolasib leh Pte. Vanlalhruaia, Churachanpur-te chu kum 1984 khan State Bank, Churachanpur Branch rawk-ah puhin thubuai siam sak an nih thu leh kum 2005 khan Manipur Chief Judicial Magistrate thupekin Sgt. Lalzar-liana leh Pte. Biakhluna te manna thupek (warrant of arrest order) Mizoram Police-ah rawn thawnin man an nih hnuah Chief Judicial Magistrate, Churachandpur-ah hruai tura tih a ni tih an sawi a. Pte. Biakhluna chu manin Kolasib Jail-ah dahluh a nih thu leh Sgt. Lalzarliana chu a zinbo avangin an man lo tih an sawi a. Pte. Biakhluna hi Jail atanga lakchhuah leh niin Doctor-in an damloh avanga Certificate ziah sakin, Chief Judicial Magistrate-ah Certificate chu thawn a nih hnuah man a nih loh thu leh Pte. Vanlalhruaia hi a in report thin avanga man tura tih a nih loh thu an sawi bawk a ni.

He thubuai hi engtianga kalpui tur nge tih law Department in an ngaihtuah hnuah thubuai ziahluh a nih tawh avangin Politics ringawt chuan sawifel harsa a rin a nih avangin Law Department-a Under Secretary Zahminga chu Manipur-ah tirh a nih thu leh Ukil ruaiin thubuai buaipuic hu Ex-MNA kutah a awm tak thu an sawi a. Hemi hnu hian kawng hrang hranga hma an lak chhoh dan te sawiin, July 23, 2024 khan thubuai hi tihtawp a nih tak thu an sawi a. Manipur High Court chuan India Sawrkar, Mizoram Sawrkar leh MNF inremnaah MNF-te an rammut laia pawi an khawihna zawng zawng chu ralthuam an dah a, remna leh muanna an huamchhunga an thlentir chuan tihtawp tura tih a nih avanga thubuai hib tihtawp a nih thu a tarlang tih an sawi bawk.