Huaisen takin, langtlang leh huapzo rorelna kalpui hi kan tum tlat a ni - Chief Minister

Chief Minister Lalduhoma chuan mipui ten rilru thar puin sawrkar thar an siam tawh tih sawiin, “Huaisen takin, langtlang leh huapzo rorelna kalpui hi kan tum tlat a ni,” a ti a. Aikal lak an tihtawp dawn thu pawh sawiin, Non Practicing Allowances (NPA) pawh dan ang taka kal an tum thu a sawi bawk.

Chief Minister Lalduhoma hian nimin khan a Office-ah Mizoram Peoples' Forum (MPF) hruaitute kawmin Sawrkar kal zel dan tura an thurawn te ngaihthlaksakin, a kaihhruai sawrkar chu mipuiten rilru thar pua an din anih angin, lang tlang leh huapzo taka an kal zel tur thu a lo hrilh a. Chief Minister chuan MPF ten an lawmpuina leh duhsakna ah lawmthu sawiin, Sawrkar nitin kal dan uluk taka lo thlira, lo zirchiang a, tihdan tur tha zawk nia lang te sawiho chu a tangkai em em tih a sawi a. State Project Monitoring Committee kal chhoh mek dan te, tunhnaia hnathawh chhia Media-a lo lang thenkhat thawktute chunga hma an lak dan te, Tender thenkhata sawrkar thutlukna siam dan te, Leiba chhawm an ngah avanga harsatna an tawh dan leh hma an lakzui dan te, Central sawrkarin puk theih chin a siam chhungah chauh sum puk an tum thu te, chumi atana inrenchemna lama hma an lakna te, tunhnaia Special Drawing Facility hmanga ni 5 emaw vel chauh an puk belh chhan chu State sawrkar tana a hlawk zawkna a awm vang a nih thu te a sawi a. CBI chu ram dan tharin a phut ang thlapa General Consent pek an nih thu pawh hrilhfiahin, “Aikal pawh kan titawp dawn a, Dan awmsa kan kengkawh ang. Chutiang bawkin Non Practicing Allowances pawh dan ang taka kal kan tum. Mipuiten rilru thar puin sawrkar thar an siam tawh a, huaisen takin, langtlang leh huapzo rorelna kalpui hi kan tum tlat a ni,” a ti a ni.

He hunah hian MPF General Secretary Rev. Lalramliana Pachuau chuan kum chanve chhung lekin sawrkar hmalakna tha leh duhawm tak tak hmuh tur a tam avangin an lawm hle tih a sawi a. Tha taka ram inrelbawlna leh hmasawnna a kal zel theih nan an pawl thiltumin a sawi angin; MPF in a ngaih pawimawh thil te a hnena thlen an nih thu a tarlang bawk.

He inkawmna hunah hian MPF hruaitu engemaw zat telin MPF hruaitute chuan Media hmanga inbeihna a nasa tih an sawi a, “Mipuite kan phawklek fo ni te in kan hria. Sawrkar sawiselna tam tak hi chu thu taka ngaih tlak loh te, thu tling lutuk lo nasa taka han vawrh lar luih te an ni tih a hmuh theih a. Chutihrualin fimkhur lehzuala sawrkar a kal a tulna te pawh a awmin kan hria. Sawrkar hi kan thlawp a, kan duhsak em avangin kan vei zawngte hi kan rawn sawi a ni,” an ti bawk.