CM hovin SBWL thukhawm

Mizoram State Board for Wildlife (SBWL) thutkhawm chu Chief Minister Lalduhoma hovin nimin khan neih a ni.

CM Conference Hall-a Mizoram State Board for Wildlife (SBWL) thutkhawm vawi 10-na ah hian Chief Minister Lalduhoma chuan tunhnaia Delhi a zinna ah Mizoram CAMPA Chairman a nih thu Union Minister of Environment & Forest in a lo hrilh tih sawiin, Union Minister hian Mizoram-a Forest Clearance fel loh vanga hmasawnna hnathawh chawlh lailawk (pending lists) a lo pe tih a sawi a, “Political Level-ah min tanpuia, heng kan harsatna te min chinfel sak hi a duh ngawih ngawih a ni. Kan ram tana hmasawnna tur, ram mipuiten tangkai taka kan hman tur hmalakna vek an ni a, a hlawhtlin theih nan kan tangrual tur a ni. Dan hi mipuite hmasawnna leh hamthatna atana siam a ni a, an harsatna leh an hmasawnna tur daltu ah kan lo hmang tur a ni lo,” a ti bawk.

He thutkhawm ah hain Standing Committee of State Board of Wildlife din chungchang te, Aizawl Zoological Park luhman tihsan ve tawh thu te, Wildlife Victims te ex-gratia tihsan chungchang te, kum 2021-a Sai in a tihhlum Hnianghniangi compensation dilna te, Zorinpui - Longmasu inkara kawngpui thar (NH 502A) laih tura ruahman leh Sairang -Tuipuibari inkar kawngpuia Lei dawhthat ngai pahnihte recommendation chungchang te, Phawngpui National Park leh Ngengpui Wildlife Sanctuary enkawl zel dan tur chungchang te an sawi a. Hun pawimawh laia Wildlife Zero Tolerance Drive neih te, Air Gun leh a kaihhnawih khuahkhirhna nasa zawk thu te, ramsa chhanchhuah te fel fai zawka enkawl dan tur te, Mizorama nungchate hming mumal leh felfai taka thliartu tur Nomenclature Committee lo din tawh tuai tharleh thute bakah, hmun pawimawh bika ramsaten kawngpui an kanna tur (corridors/passages) siam thute an sawi a ni.