Learn to Live Together Camp-a tel te Minister in kawm

Social Welfare & Tribal Affairs, Women & Child Development Minister Lalrinpuii chuan June 24-29, 2024 chhunga Chandigarh, Punjab-a neih zawh tak 39th Learn to Live Together Camp-a tel Mizo naupang 6 leh anmahni hruaitu mi pahnih bakah Mizoram State Council for Child Welfare Member te chu nimin khan a Pisa-ah a kawm a. He hunah hian Camp-a kal te hian an kalna chanchin leh an thil tawn te sawiin, Camp-ah hian State hrang hrang 18 atangin naupang an kalkhawm a. Item hlimawm tak tak leh naupang tana tangkai tur thil hrang hrang entir a ni a. Mizoram aiawha kalte pawhin item an neih chu lawm a hlawh thu leh Closing function-ah an item chu tih nawntir hial an nih thu an tarlang a ni.

He Camp hi Indian Council for Child Welfare bultuma neih a ni a, Mizoram atangin Saihnuni Sailo Memorial School zirlai naupang paruk, hmeichhia 3 leh mipa 3 bakah escort 2, he School zirtirtute an kal a ni. Mizoram State Council for Child Welfare (MSCCW)-ah hian Mizoram Governor chu Patron niin SW&TA, Minister hi Ex-Officio Chairman a ni a. Working President hovin member 30 an awm mek a ni. Kum 2022-a din niin tunah hian naupang 12 te kumkhat a Rs. 5000-in an sponsor mek bakah naupang huaisen 30 vel huaisen lawmman an dawn theih nan buaipuiin hma an lo lakpui tawh bawk a ni.