Dan lova sawrkar hmunhma tichhe zawnga hmalakna EF&CC Department in an dem

Environment, Forests & Climate Change (EF&CC) Department chuan dan lova Sawkar hmunhma tichhe zawnga Bethlehem Vengthlang mi thenkhatte hmalakna chu an dem thu an sawi.

Hemi chungchanga thuchhuah an siamah Environment, Forests & Climate Change (EF&CC) Department chuan July 5, 2024 khan Bethlehem Vengthlang YMA President leh Chairman, Local Council te chuan Principal, Forest Training School hnenah ziakin, Forest Training School Tennis Court paltlanga kawng awm sa chu tihzauh deuh a, laih tlang an tum thu leh an hmalakna ah harsatna siam lo turin FTS Principal chu an hriattir thu an tarlang a. FTS Principal chuan Forest Training School Compound chhungah kutthlak phal a nih loh thu leh phalna nei hmasa lo chuan kutthlak lo tura hriattirin, an thil duh chu dan ang taka kalpui anih theih nan an sawi anga ruahmanna awmsa a lo awm anih chuan a rang lama thehtut tura hriattina lehkha chu July 11, 2024 khan tichhuakin, he lehkha hi Chairman, Local Council, Bethlehem Vengthlang leh President, YMA, Bethlehem Vengthlang te pek an ni tih an tarlang.

Hemi hnuah July 22, 2024 khan Principal, FTS chuan lehkha tichhuak lehin Bethlehem Vengthlang Local Council Chairman leh Bethlehem Vengthlang YMA President te chu mahni thua kutthlak lo tur leh FTS Complex chhungah phalna nei lova kutthlak a awm anih chuan dan anga kalpui a nih tur thu hriattina siam nawn lehin, khawtlang tana ram mamawhna a awm a nìh chuan dan anga kalpui a nih theih nan an lehkha neih sa te, ruahmanna awm tawh sa te a rang lama thehlut turin a hriattir tih an tarlang a. Hetih mek lai hian FTS Principal hriattina chu ngai pawimawh lovin July 23, 2024 zingkar-ah Gate leh Tennis Court Fencing te tichhiain, kawng hi laih tan a ni tih an tarlang.

Hetianga dan lova Sawkar hmunhma tichhe zawnga Bethlehem Vengthlang mi thenkhatte hmalakna hi Forest Department chuan pawi a tiin an dem hle tih an thuchhuah ah hian tarlangin, “Sawrkar hmun pawimawh Forest Training School Complex chhunga dan loa chetna hi kan dem takzet a ni,” an ti a. Sawrkar chuan helaia kawngpui sial chungchang hi uluk takin a ngaituah mek thu leh mipuiten an mamawh dan te leh FTS ram neih dan te pawh a zirchian mek thu sawiin, “Hetihlaia thuneitu sawrkar rawn hmasa lo a thil tichhe zawnga sawrkar ramchhunga chet lak hi khua leh tui thate tihdan turah Forest Department chuan a ngai lo a, hetiang thil hi thleng nawn tawh lo se a duh tak zet a ni,” an ti bawk.