Mizoram leh Assam ramri chungchanga inbiakna thla thar August 9-ah neih leh tum a ni
Home Minister K. Sapdanga'n Akashvani Aizawl a hrilh danin inbiakna neih tur chungchangah hian Assam sawrkar hian Mizoram sawrkar a rawn be pawp a, State pahnih aiawhte remchan hun dapin ruahmanna siam a ni a. Tun tum inbiakna ah hian Assam sawrkar palaite hi an Border Prtotection and Development Minister Atul Bora-a'n a rawn ho ang a, an State Home Secretary bakah Home Department leh a kaihhnawih Official dangte lokal tura ngaih a ni a. Mizoram lam atangin Home Minister K. Sapdanga telin Home Secretary Vanlalmawia leh Official dangte'n an tawiawm ang.
Home Department hotute'n an sawi danin nikum tawp lam khan Assam palaite hian inbiakna chhunzawm tura Aizawl lokal an tum a, amaherawhchu, Mizoram Assembly inthlan a hnaih tawh em avangin lokal rih lo tura thurawn pek an ni a. Inthlan hnu kumin February ni 9 khan Chief Minister thar Lalduhoma leh Assam Chief Minister Himanta Biswa Sarma te chu Guwahati-ah inhmuin Assam Chief Minister hian a aiawh Minister rawn tirh thuai a tum thu a sawi na in Parliament inthlanpui-in a nang chho leh ta si a, inbiak hun hi sawn hlat a ngai leh ta a ni.
Tun tumah hian State pahnih aiawhte hi an inbe thei a nih chuan State pahnih Minister te inbiak vawi 4-na tur a ni dawn a. A hma lam hian Aizawl-ah vawi hnih an inbe tawh a, kum 2022 November thla khan Guwahati khawpui-ah an inbe leh a. Khami tuma an inbiakna a an remtih tlan angin Mizoram sawrkar chuan Mizoram chin ni a a pawm khaw 62 hming te a thehlut a. Hei hi ngun taka a hmun ngei a zirchian hnu a thehluh a ni. Tun tum inbiakna-ah hian hei hi sawi a nih rin a ni bawk.
Assam leh Mizoram ramri buai hi kum 1972-a Mizoram UT-a hlankai a nih tan, a taka a hmun ngei a ramri rin lova North-East Areas Reorganisation Act, 1971-in a sawi dan ringawta ramri a siam avanga lo intan a ni a. Ramri hmun hrang hrangah buaina leh tharum thawhna thleng fo mah se, July ni 26, 2021-a Vairengte dai-a Mizoram leh Assam Police an inkah ang em kha a la thleng ngai lo a. Khami atang khan State inthenawm pahnihte chuan ramri chingfel turin ngawrh zawkin inbiakna an buatsaih chho ta a. Official-te vawi tam tak an inbiak bakah Minister-te an inbe tawh a. Chief Minister hlui Zoramthanga leh Assam Chief Minister Himanta Biswa Sarma te pawh kha vawi hnih lai Delhi-a an inbiak bakah Chief Minister thar Lalduhoma leh Assam Chief Minister te hi an lo inbe tawh bawk a ni.
Comments
Post a Comment