Governor in khum 100 awmna RIPANS Hospital sak thar leh Campus a hmasawnna te a tlawh

Governor Dr. Hari Babu Kambhampati chuan nimin khan Aizawl-a Regional Institute of Paramedical and Nursing Sciences (RIPANS) tlawhin an dinhmun te a enpui.

Governor hi RIPANS Director Dr. Sanjay D Sawant leh a thawhpui ten lo dawngsawngin, khum 100 awmna RIPANS Hospital sak thar chhunga Section hrang hrang leh Ward hrang hrangte an en tir a. RIPANS Faculty te chuan kumin kumtawp lamah Hospital hi an thawk tan thei dawn tih Governor hnenah hian an sawi a. Hemi kaihhnawihah hian a panna kawngpui siam tha turin Mizoram PWD hnenah ngenna an siam a. Power supply leh Tui supply-na atana PHE Department leh P&E Department-te puihna an mamawh thu an sawi bawk a. Heng thil pawimawh pathum te hi State lam atanga tihhlawhtlin sak an nih chuan anmahni lam chu kumin kumtawp lam, October emaw November thlaah chuan Damlo leh a mamawhtu tan he Hospital hi hawn theih a beiseiawm an ti a. Governor hian Ccampus chhunga Medical Superintendent Quaters, Doctors Quarters, Staff Nurse Quarters, Indoor Sports Complex & Auditorium, General Hostel, Guest House leh Academic Building Block - IV te, a then sak zawhfel tawh, a then la sak mek te a enfiah bawk.

Governor pual hian RIPANS Conference Hall-ah Official Meeting tawi neiin Dr. Sanjay D Sawant chuan inlawmna thu sawiin, Dr. Ruby Z Ralte, Administrative Officer chuan RIPANS chungchang a sawifiah bakah tun dinhmuna RIPANS in mamawh tlem a neih te leh Governor puihna an mamawhna te RIPANS thuneitute chuan an thlen nghal a ni.

Governor hian RIPANS hotute chuan an Campus hmasawnna atan hna an thawh that thu sawiin, nakin lawkah chuan he RIPANS Hospital, tuna khum 100 awmna hi India rama Sawrkar damdawi In tha filawr AIIMS, Delhi te anga tihchangtun a nih a beiseiawm tih a sawi a. RIPANS Hospital, nakum kumtir lama a taka hman theih tura beisei hian Mizoram tan chauh ni lo, hmarchhak bial pumpui tan pawh Healthcare Sector-ah Service Quality tha zawk a rawn belhchhah dawn avangin a lawmawm tih thu a sawi bawk.

RIPANS hi kum 1995-96-a NEC hnuaiah din a ni a. 1st April 2007 khan Ministry of H&FW-ah sawnin tunah hian Ministry of H&FW, Govt. of India in a enkawl bik institute awmchhun a ni ta a ni.