Kan ram economy chawinunna thisen zunzam chu Entrepreneurship hi a ni - Minister, LESDE

Labour, Employment, Skill Development & Entrepreneurship (LESDE) Minister Lalnghinglova Hmar chuan nimin khan Mizoram University (MZU) Incubation Centre hnuaia ‘Entrepreneurship Development Centre’ hawngin, “Kan ram economy chawinunna thisen zunzam chu Entrepreneurship hi a ni,” a ti.

Indian Institute of Entrepreneurship (IIE) kaltlanga NEC hnuaia ‘Entrepreneurship Development Centre’ hawnna hunah hian LESDE Minister Lalnghinglova Hmar chuan tun tumah hian Building an hawng satliah lo tih sawiin, “Hmathlir (Vision) kan tlangzarh tel a ni,” a ti a. “Chu kan hmathlir-ah chuan kan ram hmasawnna tur leh thanlenna tura kan suangtuahna (Dreams) te chu Entrepreneurship kaltlangin a tak ramah a chang dawn a ni. Entrepreneurship programme kaltlangin kan thalaite talent peipun a, chhawr tangkai a ni ang a, chu chuan kan ram economy a ti thang lian dawn a ni,” a ti a. “Kan ram economy chawinunna thisen zunzam chu Entrepreneurship hi a ni a, Entrepreneurship hian thilthar ngaihtuahchhuahna/chinchhuahna (Innovation) chu kan thalaite-ah a chhem-alh ang a, chu chuan eizawnna ngialnghet leh khawtlang hmasawnna a hring chhuak dawn a ni,” a ti.

Entrepreneurship hi Mizoram-ah pawh a lar chho viau thu leh thalai tam takin an bawh mek thu LESDE Minister chuan sawiin, hetiang a nih mek lai hian Entrepreneurship in Risk a ken tel erawh kan hriat a ngaih thu a sawi a.Market demand inthlak reng te, Business planning mumal loh vang te, Competition nasa lutuk leh tanpuitu awm loh avang te leh chhan dang dang avangin hlawhchhamna a awm theih thu leh thalai Entrepreneur te chuan tumruhna leh taimakna an neih a, an tei rei peih a ngaih thu a sawi a. Entrepreneurship-a hlawhtling tur chuan idea neih that te, taimak te, market trends hriatchian te bakah Networking thiam a tul thu sawiin, Networking thiam in kawngro a sut thu te a sawi bawk.

Nimin-a EDC hawnna hunah hian Prof. Laldinliana, Director MZU Incubation Centre chuan inlawmna thu sawiin, MZU Incubation Centre hnuaiah hian Company 38-ah an enkawl mek thu a sawi a. MZU Vice Chancellor Prof.Dibakar Chandra Deka pawhin thu sawiin, Incubation Centre te siamchhuah Apps 2: Sentezel leh Thlado a tlangzarh nghal a ni.