CBI General Consent pek chungchang la sawi zui zel

Mizoram Pradesh Congress Committee (MPCC) Vigilance Cell chuan Chief Minister in CBI te General Consent a pek dan nia a sawi chungchang ah thu dik ziktluak lo a awm nia an hriat thu an sawi.

Nimin-a Aizawl Press Club-a thuthar thehdarhtute an kawmna ah MPCC Vigilance Cell chuan MPF hruaitute hnena Chief Minister Lalduhoma'n CBI hnenah 'ram dan tharin a phut ang thlapin General Consent kan pe' tia a sawi chungchangah Chief Minister-in ‘ram dan tharin a phut’ a tih hi Indian Penal Code, 1860 thlaktu Bharatiya Nyaya Sanhita, 2023 nia a lan thu sawiin, CBI Consent pek chungchang ah he dan thar hian engmah phut a nei lo a, CBI Director-in State tin te hnena lehkha a thawn dungzuia ZPM sawrkarin remtihna thar an pek July ni 1-a Mizoram Gazette Notification a an chhuah ah pawh he ‘dan thar’ hi sawi lan a ni lo niin an sawi a. “ZPM ten CBI hnena General Consent kan pe an tih leh MNF Sawrkar kalta in Partial Consent an pek khan danglamna pakhatmah a nei lo,” an ti a ni.

PC Party President Vanlalruata pawhin nimin khan Aizawl-a an party Office-ah CBI te hi tun dinhmunah General Consent hi pek an nih loh thu a sawi a. Kum 1990-a Mizoram in CBI hnena consent a lo pek tawh thu te, kum 1995-ah hei hi sawrzimin kum 2002-a Consent tihtawp anih thu te a sawi a. “ZPM a lo sawrkar a, an sawrkar hlim te ah General Consent an pek thu insawitheih nan an hmang a. Mipui pawh kan lawm a, corruption case lian te CBI in an chhui hun tlumtea thlir taka kan thlir laiin kumin June 27 khan hei hi tihtawp leh a ni,” a ti. CBI te General Consent pek hi a that leh that loh chu a thlirtu ngaihdana innghat a ni tih pawh sawiin, “Chutihlai chuan sawrkar in a duh anih phawt chuan General Consent hi a pe thei a ni,” a ti bawk.