CBI General Consent pe leh nghal turin MNF in an phut

MNF Legal Board chuan Chief Minister Lalduhoma’n a lo tlangaupui tawh ang ngeiin CBI hnenah General Consent pe leh nghal tura ZPM sawrkar an phut thu an sawi.

Nimin-a Aizawl Press Club-a thuthar thehdarhtute an kawmna ah MNF General Hqrs. Legal Board Vice Chairman Lalpianfela Chawngthu chuan ZPM sawrkar chu CBI chhui tur leh chhui loh tur Case thlan kual vel nana hun khawhral lo turin a ngen tih sawiin, “Sawrkar phalna ziaka an neih phawt loh chuan CBI-te che thei lo tura siam an nih rual deuhthaw a ZPM Legal Dept. ten Lokayukta-a case thlan chhuak bik pathum (3) chauh CBI chhuitir tura ngenna lehkha an thehlut nghal chuan entir dang a nei lo a, ZPM sawrkar leh Chief Minister hian an huat zawngte chauh CBI chhuitir a, an lamtang leh an mi leh sate erawh hum zel an tum zia a lantir a ni,” a ti a. Politics-a phuba lakna hmanruaa CBI hman an tum dan lo lang chhuak nghal chu thil vanduaithlak tak, Mizorama la thleng ngai lo leh Kristian rama thleng atan pawha mawi lo tak ni ah mipuiin an ngai tih a sawi bawk.