RRF-a chengte dinhmun tihchian vat duh

Kolasib District chhung khaw hrang hranga ram neitu kalkhawm te chuan Resolution siamin, Roadside Reserved Forest chhunga chengte dinhmun chu sawrkarin tichiang vat se an duh tih an sawi.

Ram neitute thuchhuah tarlan dan chuan, Forest Act 1955 tlawhchhana January 27, 2021-a RRF Notification 1965, High Court-in a a lo hnawl tawh, tunhnai a Supreme Court-in tinung leh tura Stay Order a tih chhuah chungchang ah Resolution siamin RRF Notification a nun leh tak avangin Forest ramchhunga chengte pawh hnawtchhuakin an chenna tur ngaihtuahsak se an duh thu an sawi a. Ram leh mipui tana hnawksak RRF Notification 1965 tinung leh tura Supreme Court-a Mizoram Environmental NGO Coordination bultuma Petition thehluttu Vanramchhuangi, VL. Hrima, Romalsawma, Rongura Hrahsel leh Dr. Lalbiakmawia Ngente te chu an dem tih sawiin, Environmental NGO te chu mipuite harsatna siamtu leh ram hmasawnna daltu dik tak an ni, an ti.

Hei bakah hian NGO ten thu dik tawk lo hmanga Court-a petition an thehlut hi hnuk kir se an duh thu pawh sawiin, Reserved Forest puan a nih dawnin mipuiah puanzarna awm lovin chhuah tawp a ni tih an sawi a, Reserved Forest puang tura danin a phutte an zawm lo niin an sawi bawk. Heng ram neitute hian RRF Notification 1965 chu thiah a nih theih nan sawrkarin hma la se an duh thu pawh sawiin, Supreme Court pawhin mipuite dinhmun thlir chunga thutlukna dik tak a siam ngei an beisei tih an sawi bawk.