Serchhip-a Independence Day lawm dan tur rel a ni
Serchhip-a India Independence Day lawm dan tur ngaihtuah hian nimin khan Serchhip DC Meeting Hall-ah District Bawrhsap Paul L. Khuma hovin sawrkar mi pawimawh leh khawtlang hruaitute an thukhawm a, Independence Day hi Serchhip Sports Complex-ah chawhma dar 10:00 atang hmangin Minister C. Lalsawivunga chu khuallian a ni ang. Parade Contingent atan School Contingent 14, Scouts and Guides, NCC, Assam Rifles Pipe Band leh Ex-Servicemen te tel thei tura beisei an ni a. Parade Contingent te hian August ni 8 atangin ni thum chhung an zir anga, Final Rehearsal hi August ni 13 ah an nei dawn a ni. Independence Day denchhen hian Home hrang hrang bakah Hospital leh District Jail-ah te tanpuina pek a ni dawn a. Hemi ni hian Sawrkar Building zawng zawngah hnam puanzar (national flag) zar vek a ni dawn bawk a ni.
Nimin-a thutkhawm ah hian Bawrhsap chuan India ram zalenna ni Independence Day hi a ropui tih sawiin, “He zalenna sualchhuak tur hian mi tam takin nunna an chan a; ropui, mawi leh zahawm taka lawm hi a phu em em,” a ti a. Kumtin a lawm thin a nih avanga ngaiah neih mai lovin, fimkhur leh uluk taka ruahmanna siam a tul thu te; he ni puala mimal, pawl leh department hrang hrangin mawhphurhna an neih te tha taka hlenchhuak theuh turin a chah a. Independence Day 2024 lawmna ah hian mipui a tam thei ang ber kalkhawm turin a sawm a, a bik takin sawrkar hnathawkte chu an mawhphurhna a ni tih hria a, a lawmna programme-ah hian tel ngei turin a hriattir bawk a ni.
Comments
Post a Comment