Manipur atanga raltlan te buhfai tur buaipui mek

Ministry of Home Affairs-in Manipur a chi leh chi intihbuaina avanga sahimna zawnga Mizoram-a lokalte tana buhfai pek tura a tih chu buaipui mek a ni.

Home Secretary Vanlalmawia a sawi danin an sahimna zawnga Mizorama raltlan awm zawng zawng tanpuina tur sawrkar laipui-ah dil a nih laiin tuna cheng vbc. 5 hu buhfai a tanpuina tur ruahman chu Manipur atanga rawn raltlante tan bika Ministry of Home Affairs-in a rawn ruahman a ni a. Ministry of Food and Public Distribution hnenah cheng vbc. 5 man buhfai pek tura ruahman turin a ti a, hei hi a hranpa a pawisa sanction ngai lova an ngaih thu Home Secretary chuan sawiin, hemi atan hian Food, Civil Supplies and Consumer Affairs Department hotute nena buaipui chhunzawm tur a ni, a ti a. A pawisa fai ni lo, a buhfai ang zawnga lokal tur a nih avangin a phurh dan tur leh thil dang buaipui a ruahmanna siam a ngai dawn niin a sawi bawk.

Tunhnaia Union Home Minister Amit Shah-a'n Mizoram Chief Minister Lalduhoma hnena raltlante tanpuina rawn pek a nih tur thu a sawi zulzuiin Ministry of Home Affairs a Under Secretary Prem Parkash chuan July ni 18 khan Office Memorandum tichhuakin Union Secretary, Food & Public Distribution hnenah buhfai cheng vbc. 5 man pechhuak turin hriattirna a tichhuak a. A copy hi Mizoram Chief Secretary pawh a rawn thawn a ni.

Tarlan tawh thin angin nikum May ni 3-a Manipur a chi leh chi intihbuaina avanga Mizo-ram a rawn tlanchhiate tanpuina atan sawrkar hmasa khan sawrkar laipui-ah sum a dil thin a. Nikum May ni 16 khan khatih laia Chief Minister Zoramthanga khan cheng vbc. 5 a dil a, raltlan an pun chak tak em avangin May ni 23 khan cheng vbc. 10 a dil leh a. Sawrkar laipui a ngawih hnuah tunah hian buhfai zawnga pe turin ruahmanna siam a ni ta a ni.