Mizoram-a Jail zatve-ah tang thei zat aia tam an tang

Mizoram District hrang hranga Tan In 10 zinga Tan In 5-ah tang thei zat bituk aia tam an tang mek.

Mizoram sawrkar, Home (Prisons) Department hnuaiah District thar pathum tih loh, District 8-ah leh Central Jail leh Central Women Jail te nen a vaiin Tan In 10 a awm mek a, Siaha, Kolasib, Lawngltai, Serchhip leh Mamit District Jail tih loh hmun dang zawngah tang thei zat bituk aia tam an tang mek a ni. Tang tam berna Central Jail, Aizawl-ah tang thei zat 438 a nih laiin tang 848 an awm mek a, Central Women Jail-ah tang thei zat 96 a nih laiin, tang 151 leh an nute tan vanga awm ve naupang 14 an awm a, Aizawl District Jail-ah tang thei zat 90-ah tang 109 awmin, Lunglei District Jail-ah tang thei zat 109-ah tang 153 an awm a, Champhai District Jail-ah tang thei zat 105 a nih laiin tang 177 an awm bawk a ni.

Mizoram pum-a Tan In-a tang awm mek zat hi an vaiin 1814 an ni a, heng zinga a tam zawk 1568 chu mipa niin, hmeichhia 227 an awm a, an nu te tan vanga naupang awm ve 19 an awm bawk a ni. Tang mek zinga a tam zawk 1,189 te hi an thubuai ngaihtuah lai mek an nih laiin damchhunga tang tur mi 56 an awm a ni.