Industries ram hmang dik lo te hun pek an ni dawn

Industries ram huamchhunga dan lova awmte leh Allotment anga hma la lo te chu insasengna hun pek an ni dawn.

Zirtawpni kalta khan Commerce & Industries Minister F. Rodingliana hovin a Pisa-ah Industries ram thubuai chingfel tura hmalakna kal mek chak zawka kalpui dan tur ngaihtuahin Commerce & Industries Department leh Revenue Department Official te bakah Aizawl DC te an thukhawm leh a. He hunah hian Industries Department ram dan lova luahtute leh Industry dinna tura Allotment pek tawh, Allotment pek an nih anga hmang lo te chhuah tir emaw, an Allotment cancel tura hmalakna kal mek leh hmalak tawhna chin thlirletna leh chak zawka tihhlawhtlin dan turte rel a ni a. He Joint Meeting hian Industries ram huamchhunga dan lova awmte leh Allotment anga hma la lo te chu insasengna hun pek nise, huntiam ral rualin Joint Task Force din ten a hmunah kalchilhin thupek zawmlote zawnchhuahna neih ni se an ti a ni.

He meeting hian document leh pass pechhuak theitu dik tak (competent authority) in a pekchhuah ni lo hmanga Industries ram lo luahte leh Allotment hmang diklo te chu rang taka chhuahtir turin chak lehzuala hmalak zel an rel a. Mi thenkhat Industries ram zuar an awm thu leh heng ram te hi lo leisak lo turin mipuite chu fimkhur turin an chah bawk a ni. He meeting hian Industrial Growth Centre (IGC), Luangmual ram chinfel chu hmalakna hmasaa neih tur anih thu leh a dang pawh rang taka hmalak chhoh zel anih tur thu an rel bawk a ni.