Aizawl-a Court rawktu a puh Police ten an man

Mizoram Police te chuan Aizawl District Court atanga Rs. 24,87,084 rutu Lalrinngheta (30) s/o Ramngaihsanga, Tuikual 'C' manin thubuai an siamsak.

Inrinni khan Aizawl Police Station-ah chanchinbumite kawmin Aizawl SP Rahul Alwal chuan misual an man dan a sawifiah a. May ni 31,2024 leh June ni 3,2024 inkar khan Court of Special ND&PS Act, Aizawl District Court chu rawk a niin misual hian Rs. 24,87,084 an ru a, he thilthleng chungchangah hian Aizawl P/S-ah thubuai ziahluh a ni a. Police te chuan hma la nghalin District Court-a a pa aia lo kal tawh Lalrinngheta chu ringhlelin ni 24.7.2024 khan Lunglei-ah man a ni a, thu zawhfiah anih hnuah a tih ngei anih thu a in puang a. Lalringheta hian June 1, 2024 chhun-ah Court-ah hian a luh thu leh pawisa hi a lak ngei thu Police hmaah a inpuang a, a pawisa lak atangin Rs. 16,52,648 chu MRB Acoount ah a dah a. A pawisa ruk hmang hian scooter a lei bakah thawmhnaw leh damdawi ruihna tur a lei bawk a. Aizawl-a Hotel hrang hrangah a awm kual hnuin Lunglei lamah a phei niin Police chuan an sawi.

Lalrinngheta hnen atang hian Police chuan a pawisa ruk hmanga a lei Scooter leh thawmhnaw engemaw zat bakah pawisa fai Rs. 36,000 an hmu let a. A MRB Account a pawisa Rs. 7,63,410 chu khawihchet theih lohin hren a ni bawk.