NH. 54 laih meka harsatna awm te sawihona neih a ni

National Highway-54 laihzauh leh siamthat hna thawh mekah Furpui lo thleng in kawng a tihchhiat leh hemi avanga harsatna thleng te chu nimin khan District Bawrhsap hovin sawiho a ni.

Serchhip DC Meeting Hall-a he sawihona hun hi District Bawhsap leh Competent Authority for Land Acquisition (CALA) Paul L. Khuma chuan kaihruaiin NHIDCL hotute leh an hnuaia Serchhip District chhunga Contractor te an tel a. Kawng laih avanga harsatna thleng hrang hrang - leimin te, tuihawk luankawr mumal lo te, Retaining Wall siamthat ngai te, ruahpui leh leiminin a tihchhiat kawng siamthat chungchang te sawiin, hmalak zel dan tur an rel a. Bawrhsap Paul L. Khuma chuan thawhhona tha tak an neih zel a tul thu sawiin, mipui mimir in kawng laih avanga harsatna an tawh te sutkian pui tur leh an In leh lo te him taka an luah zuizel theih nan theihtawpa hmalak pui turin a sawm a ni. 

NHIDCL hotute leh an hnuaia Contractor te pawhin an theih ang anga hma an lak chhunzawm tur thu he Meeting-ah hian an sawi a. Karleh Thawhtanni, July ni 29, 2024 khian District Administration Official te, NHIDCL aiawh te, Contractor te, Village Council te leh a kaih-hnawih chhungkua te nen a hmunah enho nise an ti bawk a ni.

Nimin-a thutkhawm ah hian Chhiahtlang, Chhingchhip, Bungtlang, Baktawng, Keitum leh Serchhip by-pass Road-a harsatna thleng te chu thlurbing deuh niin hemi huamchhunga harsatna tuartut en complain an thehluh 39 chu ngaihtuah ho a ni.