Hmun hlauhawm laia Inhmun cancel turin phut

Bawngkawn Shalom Vengthar Welfare Committee chuan an Veng huamchhung Bawngkaw leh Durtlang inkar leimin vanga harsatna an tawh belh zel loh nan hmun hlauhawm laia ram neite License cancel sak turin sawrkar an ngen tih an sawi.

Bawngkawn Shalom Vengthar Welfare Committee hian thuchhuah siamin, an Veng huamchhunga mimal ram laih leh Petrol Pump siamna tura lei laih tantirh atangin veng mipui, helai ram chinchang hriate chu an hlauthawng hle tih an sawi a, helai hmun hi mihring kutthlak miah loh pawha a khat tawka lung leh lei tla reng a nih thu leh tuna Petrol Pump laih mekna bul mai atang hian kum 2017 khan nasa taka lung tlain, In pakhat pawh a delh chhe vek niin an sawi a. Tuna leiminna pawh hi nikum kumtawp lama an laih atangin veng mipuite an hlauhthawn avangin AMC leh Bawrhsap hnenah pawh hma la turin an lo thlen tawh thu leh, hetiang avanga an veng mipui mahni In leh lo pawh luah ngam lo leh thlabara an awm thu an sawi a, tun hnuah helai hmun hlauhawm, a bikin kawngchhak lam zawng zawnga LSC emaw, VC Pass emaw nei zawng zawngte chu cancel sak vek turin sawrkar an phut tih an sawi a ni.