SDVA Season Opening Tournament khelh tan a ni

Serchhip District Volleyball Association (SDVA) buatsaih ‘Season Opening Tournament 2024’ chu nimin khan Serchhip Vengchung Volleyball Court-ah khelh tan a ni.
SDVA Season Opening Tournament hi SDVA Patron Zothanpari Zote (RO Forest) chuan khuallian nia hawngin SDVA chu vawi tam tak Serchhip District lo ti hmingtha tawhtu an ni tih sawiin, Mizo thalai tam tak ten ruihhlo avanga harsatna an tawh mek laia ruihhlo in a tihbuai loh infiammi tam tak an la awm chu lawmawm a tih thu a sawi a. Thangthar lo awm zel tur ten an entawn tura an nundan uluk tura chahin, infiammi tan taksa leh rilru hrisel neih a pawimawh thu leh ruihhlo laka fihlimna atan pawh infiamna chu thil tangkai a nih thu a sawi a. Infiammi tan mahni inthunun thei mi nih a pawimawh thu te, infiammi ruilru pu chunga nuam ti taka inkhelh a pawimawh thu te sawiin, mahni khingpui te zah thiam tur leh a eng zawnga thil thlir tlat mi nih tum turin he huna tel te chu a chah bawk a ni.

SDVA President K. Tlangthanmawia kaihhruai he Tournament hawnna inkhawm ah hian Match Commissioner Zothansanga chuan Report pein he Tournament hi tunkar Zirtawpni, August 2, 2024 thleng awh tura ruahman a ni a. Mipa Team 15 telin Pool 4-ah then an ni a, Pool khat-a awm zel te hi inkhel kualin point hmu sang pahnih theuh ten Quarter Final an khel dawn a, tunkar Nilaini-ah Quarter Final hi khelh hman tum a ni.

Hmeichhe lama Team 7 telin Pool pahnih ah then an ni a, Pool pakhat-a awm zel te hi an inhmachhawn anga, point hmu sang pahnih ve ve ten Semi Final an khel dawn thung a, Ningani-ah Mipa leh Hmeichhia Semi Final hi khelh tur a ni ang.

Tun tuma SDVA Season Opening Tournament-ah hian Serchhip Town pawnlam atangin Bungtlang, Lungpho, Chhingchhip, Thentlang, Keitum leh Hriangtlang atangin Team an rawn tel thei a, inkhel tur hi a tam deuh avangin zam lamah pawh khelh tura ruahman a ni bawk.