Thuthar thenkhat

Paper bag siam dan zirho

Urban Development & Poverty Alleviation Department hnuaia Day-NLUM, Lunglei buatsaihin nimin khan Lunglei-a Convention Centre-ah Paper Bag siam zirna neih a ni a. He hun hi Addl. DC R. Vanrengpuia chuan hman-puiin Sawrkar in polythene leh plastic hman hi khap mahse, hmang lo thei lovin kan la awm a, a thlakna atana Paper bag siam dan zirna Self Help Group te tana buatsaih a ni chu lawmawm a tih thu a sawi bawk. Rampum-ah Solid Waste Management Rules 2016 hmangin khawpui bawlhlawh sawngbawl dan chungchangah khauh taka hmalak ani a. Polythene (50 micron aia tlem) hman in leilung leh tuihna a tihchhiat tawh em avangin sawrkarin a khap tawh a ni.

Inthlan-a duty tur chhuak

Tunkar Zirtawpni-a Chakma Autonomous District Council (CADC)-a Village Council (VC) 88-a inthlanpui buatsaih tur leh Lai Autonomous District Council (LADC)-a Council Veng VC seat khat hnawh khah nana by-election buatsaih tura Polling Party 89 zinga 52 chuan nimin khan an duty-na tur hmun panin Lawngtlai an chhuahsan a, Vawiin-a chhuak ve lo Polling Party 31 leh Sector Officer 4 te chuan Vawiin hian an duty-na tur Polling Station an pan ve leh ang. CADC-a VC 88 awm zinga VC 6-ah chuan inthlan ngai lovin a ding zawng zawng chuhtu awm lova tlinga puan nghal an ni a. Hei vang hian VC 82-ah inthlanpui leh VC seat 1-ah by-election hi neih a ni ang.

END in Zu an man tam

Excise & Narcotics Department chuan thla kalta, Feb. 2020 chhung khan Zu zuar mi 214 manin zurui mi 8 an man a, Rakzu litre 8363.285 zet manin Zu bilhlai Tin 11106 zet an man bawk. Hemi chhung hian Sapzu (IMFL) um puitling 916 manin um chanve 30 an man a, Beer bottle 24 leh Canned Beer 831 man niin rampawn lam atanga Zu lakluh 264 leh Canned Beer 6 an man a, Zu sakna bel 53 leh Motor 16 zet man a ni bawk.

Aizawl harsatna sawiho

Aizawl Municipal Corporation (AMC) huam-chhunga Local Council te tan AMC Conference Hall, Thuampui-ah 'One Day Consultation Meeting on Acts and Rules Relating to Motor Vehicles, Vehicles Parking and Noise Pollution' chu neih a ni a, he hun hi Transport Department Commissioner & Secretary, KT. Beicho, IRAS chuan kaihruaiin UD&PA, PWD, Traffic Police, Aizawl Municipal Corporation leh Transport Department hotuten he hun hi an hmanpui a ni.

Aizawl-a lirthei tam lutuk avanga harsatna awm hrang hrang chungchangah hemi kaihhnawih Department hrang hrang atangin sawifiahna (presentation) neih a ni a, motor parking chung-chang te, lirthei khu nasa chungchangte leh lirthei ri bengchheng lutuk chungchangte sawilan niin heng avanga mipuiin harsatna an tawh dante sawiho a ni a, hemi sukiang tura sawrkar leh Local Council te tangho a hmalak dan tur te ngaih-tuah a ni a bawk a. Aizawl khawpui chu chenna atan hmun nuam zawka siam turin khawtlang hruai-tute leh mipuiten tun aia nasa zawka hmalak a tulzia pawh tarlan a ni bawk.

MCAB in harsatna tawklo

Mizoram Cooperative Apex Bank chuan tunhnaia YES Bank-in harsatna a tawh in Mizo-ram Cooperative Apex Bank Ltd. Customer te tan pawisa dahluh leh lakchhuah kawngah harsatna engmah a siam lo tih thuchhuah siamin an tarlang a. MCAB thuchhuah chuan pawisa dahluh leh lakchhuah hi dan pangngaiin Bank Branch leh ATM atanga tih theih reng a ni tih tarlangin, IMPS hmanga pawisa inthawn kawngah pawh harsatna a awm lo a. Mizoram Cooperative Apex Bank Ltd. in RTGS/NEFT hmanga pawisa inthawn tawnna atana YES Bank a lo hman thin chu hman a remchang rih lo avangin RTGS/NEFT hmanga pawisa thawnna atan IFS Code - HDFC0CMCABL chu hman zawk tawh tur a ni tih an tarlang bawk.

Party zawm thar lawmlut

Mizoram Pradesh Congress Committee (MPCC) chuan nimin khan Hachhek Bialtu MLA, Lalrindika Ralte chuan Mamit District chhung Thinghlun khua ah MNF atangin voters 97 te Congress-ah a lawmlut nia sawiin, mithar lawm-luttu Lalrindika Ralte chuan MNF sawrkar-ah MNF worker-te an beidawng niin a sawi bawk.

Horticulture Exhibition nei

Lawngtlai Horticulture Division leh Lawngtlai Florist Association (LFA) tangkawp buatsaihin nimin khan Lawngtlai-a LADC Conference Hall-ah Horticulture Exhibition 2020 chu neih a ni a. Tun tum hi tum thum an buatsaihna niin mi 45 in Pangpar chi 16 an phochhuah bakah Kut hnathawktu 49 te'n thei leh thlai chi 16 an phochhuak bawk.