Mizoram-a rawn lut te enfiah zel an ni

Nimin chhun lai atanga vawiin chhun thleng khan state dang atanga Mizorama rawn lut mi 151-te chu an hriselna lo enfiahsak an ni.

Mizoram pumah Screening point hi 15 a awm mek a, sawrkar laipuiin Curfew a puan tak avang leh Lengpui tumhmuna Thlawhna thlawk lut a awm tak loh avangin nimin leh vawiin ah chuan Screening point 3 – Kolasib District-a Vairengte leh Bairabi bakah Mamit District-a Kanhmun-ah te chauh enfiah ngai an awm a. Vairengte-ah mi 145 enfiahin dah hran ngai an awm lova, Bairabi-ah mi 5 enfiahin an zinga 1 chu dah hran a ni a, Kanhmun-ah mi 1 enfiah a ni bawk.

Heti hian vawiin chhun thleng khan Mizoram-ah mi 60,694-te enfiah an ni tawh a, ram pawn atanga lo haw mi 198 dah hran an ni a, state dang atanga lo haw mi 2,390 te chu mahni inah inkhung hrang turin hrilh an ni tawh a, damdawi inah mi 4 dah hran an ni tawh a, Covid-19 vei leh vei loh hriatfiah nana sample lak tawh chu a vaiin 26 a ni a, Covid-19 vanga damdawi ina dah chu mi 1 a ni a, thihpui tumah an la awm lo a ni.