Road Safety Week hmang tan

Mizoram pumah nimin atang khan Road Safety Week vawi 31-na chu hman tan a ni a, he Hapta hawnna Serchhip-a neih tura ruahman chu tunlai-a hri leng, Covid-19 avangin thulh a ni thung.

Lirthei chetsualna leh kawng-a kal mipuite an him theihna tura rampum huapa inzirtina hun, Road Safety Week vawi 31-na hi tunkar chhungin Mizoram pumah hman tura ruahman niin Serchhip-ah pawh nimin khan a hawnna nei-a hun hman tura ruahman a ni a, amaherawh chu tunhnaia khawvel pum in a buaipui, Covid-19 avanga pupunna hun huaihawt lo tura sawrkar in a ngen angin he Hapta hawnna Serchhip-a neih tura ruahman chu thulh a ni ta thung a ni.

District Road Safety Committee-a Secretary Serchhip DTO, B. Lalrinsanga chuan he Hapta hawnna neih tur hi thulh ni mahse Hapta hman chhunga hmalakna hrang hrangte chu Dan pangngai a kalpui zel a nih dawn thu a sawi a, Traffic Police leh MVI ten lirthei enfiah hna an thawh tura lo ruahman tawh te, Commercial Vehicle-a Driver tha thlanna neih tura lo ruahman leh mipuite fimkhur inzirtirna atana thuziak sem tura lo ruahman tawh te pawh Dan pangngaia kalpui a nih dawn thu a sawi bawk a. Hemi ang hian nimin khan dan phalloh a lirthei khalh an awm leh awmloh enfiah hna hi thawh tan niin fimkhur tura inzirtirna thuziak sem nghal a ni bawk.