MZP in Bairabi Zophai tlawh

MZP General Hqrs. hruaitute chuan niminpiah khan Bairabi Zophai tlawhin khawtlang hruaitute leh NGO hrang hrangte nen inkawmna an nei.

MZP chuan kan pi leh puten an thlah kal zel turte tana lu chhum ban chhum huama chenna atana an lo sah zauh tawh leh an lo enkawl tawhte, tun dinhmuna mi ram ang hiala ngaih a lo ni ta leh neih let leh theih loh ang hiala pil bo hret hret chu pawi an ti hle tih sawiin, hemi chungchanga thang-tharte leh Zoram mipuite thudik hriattir a, chawh nun-a a awm leh theih nan hma an la zel a. Hemi chungchanga Bairabi-a khawtlang hruaitute leh NGO hruaitute an kawmna ah hian ramri chung-changah khawtlang hruaituten an ngaihdan hrang hrang sawiin, hmalak ho zel dan tur te leh Ramri chinfel a nih theih nana hmalak chhunzawm dan tur thil hrang hrang sawiho a ni. “Zophai-a IR Police awm te hi thuamthat nise, Zophai tlang Baibun-ah hian Police Duty post leh Forest Beat Post Zophai bul Baibun tlang-ah Mizoram Sawrkar hian dah ve rawh se,” tiin Resolution an pass a ni.

Inkawmhona neih a nih hnu hian Zofate Chawlhbuk sakna hmun tur chu tlawh ho a ni a, he hunah hian MZP General Hqrs. President, B. Vanlaltana MZP chuan kan pipute sah zau kan ram humhalha a awm theih nan ramri humhalh chu thangtharte tih turah a ngai tih sawiin, “Kan ram humhalha hma kan lakna kawngah Zofate Chawlhbuk sa thei lo a kan awm lai leh sawrkar kan ngaihchan mek laiin Mosolman biak in sak chhunzawm a ni hi kan hrethiam lo hle a, Mosol-man Biak In hi sak chhunzawm leh a nih chuan Zofate Chawlhbuk kan sa ve nghal dawn a ni,” a ti bawk. MZP hruaitute chuan a tul huna hman mai theih tur Zofate Chawlhbuk sakna tur ban ril zawm hnatlang an nei nghal a. Bairabi Zophai hmun a Mosolman Biak In sak a nih chuan Zofate Chawlhbuk hi sa ve nghal turin an inbuatsaih reng tih an sawi bawk.