Mizoram-ah mi 995 khung hran an ni tawh

Mizoram pawn atanga Mizoram-a rawn haw mi 995 te chu nimin thleng khan mahni In ah khung hran an awm tawh.
Mizoram sawrkar in thuchhuah siama a tarlan danin Coronavirus (COVID-19) avang hian Mizoram sawrkar chuan kawng hrang hrangah hma a la mek a, tun thlengin mi 47,805 enfiah ni tawhin India rampawn atanga Mizoram-a rawn haw mi 166 leh India ramchhung State leh UT dang atanga rawn haw mi 729, an vaiin mi 995 te chu mahni In a khunghran/Home Quarantine tura tih niin damdawi In-a dahhran erawh an awm lo a, mi 10 te chu an sample laa enfiah niin COVID-19 vei erawh hmuhchhuah an la awmlo thung a ni.
Mizoram sawrkar thuchhuah tarlan danin WHO chuan Novel Corona Virus (COVID-19) chu khawvel pumah darh tawhah puangin, ram 182-ah a darh tawh a, he COVID-19 lo darh zel tur ven anih theih nan mipui te chu sawrkarin mipui himna tura a thuchhuah te zawm vek turin a ngen a. Mitin ten kan khuhin Kiu/Ban thlepin Ka kan hup tur a ni tih tarlangin, Tui leh Sahbawn-in fai takin kut sil fo tur a ni tih an tarlang a. COVID-19 vei awmna ram/state atanga lo haw te chu, an lo thlen ni atangin ni 14 tal, mahni In-ah emaw, sawrkar hmun ruat bikah khunghran tur a nih thu leh hei hi natna neilo te pawhin zawm ngei tur a ni tih a tarlang bawk.

Comments

Chhiar Hlawhte