Minister in Dan siam te zawm turin mipuite a chah

Transport Minister, TJ. Lalnuntluanga chuan lirthei khalhtute, lirthei neitute leh mipui te chu lirthei kaihhnawiha sawrkar-in Dan a siamte chu zawm turin a chah. Road Safety Week vawi 31-na hawnna inkhawm nimin-a Aizawl-a a Office-a neih ah Transport Minister, TJ. Lal-nuntluanga chuan kumin a Road Safety Week-ah hian 'Dan zawm hi himna a ni' tih chu thupui ah hman a nih thu sawiin, kum khat chhungin India ramah lirthei chetsual vanga thi mi 150,000 chuang an awm thu sawiin, lirthei khalh fimkhur loh avanga kumtin chhiatna rapthlak tak tak thleng thin chu Dan zawm avangin tam tak pumpelh theih a ni tih a sawi. Hei vang hian lirthei khalhtute, lirthei neitute leh mipuite chu lirthei kaihhnawiha sawrkar-in Dan a siamte chu zawm tur leh fim-khur taka lirthei khalh thin turin a chah a ni.
He hunah hian Transport Director, R. Lalrammawia chuan Road Safety Week hman dan a sawifiah bakah Driving License lem siam chungchang sawilan niin, Driving Test paltlang lova Driving License Rs. 3000/- vela lei theih anga thuthang chungchang leh Social Media thlenga hmuh theih a awm te chu chhuichian a nih thu te, Dan bawhchhetute chu Case siam sak an nih thu leh License lem sang chuang man a nih tawh thu a sawi a. Transport Department in Dan anga a pekchhuah License-ah hian chip phum a ni a, he chip hi Transport Department-a IT Cell atanga tih nun (activate) a ni. A lemah hian chip ang tak awm ve mahse khawl chhiar theih (machine readable) a ni a. Driving license lem siam thin te laka fimkhur tur leh Dan ang taka Driving License dil thin turin Department chuan mipuite a chah a ni.
Tax leh Fee chungchang pawh he hunah hian sawilan niin Department system-a la awm, lirthei kum 15 tling tawh, Registration thi tawh 45,000 chuang a la awm thu tarlan a ni.

Comments

Chhiar Hlawhte