Central YMA in thahnem ngai zel turin fuih

Central YMA chuan Ramri dep a awm Sub-Hqrs./Group/Branch YMA hrang hrangte’n tha thlah miah lo leh a thim a var pawh thlu lova kan ramri tha taka an vil chu Mizo mipuite kan la himtlanna a ni tih sawiin, thahnem ngai taka hma la chhunzawm turin an in ngen.

Nimin-a thuchhuah an siamah Central YMA chuan Covid-19 (Corona virus) avangin khawvel hmun hrang hrangah harsatna nasa tak a thleng mek tih tarlangin, Mizoram pawh he harsatna hian min chim tan ve ta mek a. He hrileng laka kan him theih nan kawng hrang hrangin Sub-Hqrs./Group/Branch YMA ten thahnemngai takin hmalakna kalpui mek a ni chu lawmawm an tih thu tarlangin, ramri dep-a awm Sub-Hqrs./Group/Branch YMA hrang hrangte’n tha thlah miah lo leh a thim a var pawh thlu lova kan ramri tha taka an vil chu Mizo mipuite kan la him tlanna a ni tih hria a thahnemngai taka hma la chhunzawm zel turin an in ngen a ni.

Central YMA thuchhuah chuan Mizoram pawn atanga rawn haw mi tam tak an awm mek tih pawh tarlangin, ram pawn atanga rawn haw te’n Sawrkar ruahman anga ni 14 (sawm pali) tal mahni inkhunghran/khunghran an nih theih nan hma lain thuneitute tanpui turin an in ngen a. Hrileng laka kan him tlan theih nan inzirtirna a remchan dan ang zela uar zawka kalpui nise tiin, tul lova punkhawm, pumpelh theih chite pumpelh hram hram turin an in chah a. He hrileng avanga ei leh bara harsatna tawk te leh tuamhlawm ngaite a theih dan anga tanpui tur leh he hrileng avanga chhiat tawk, ruang buaipui ngaite an lo awm a nih pawhin Sawrkar ruahmanna ngaihchan thiam a tul thu te an tarlang bawk a ni.