Chanchin thar thenkhat :

Mizoram mi hruailuh an ni

Tunhnaia hri leng avanga India leh Myanmar inkalpawhna kawngpui, Zokhawthar ami khar a nih avanga India khua leh tui Myanmar lama tangkhang te chu Mizoram-ah hruailuh an ni ta a, heng mite hi an vaiin mi 28 niin an zinga mi 2 te chu March 28, 2020-ah lakluh niin midang 26 te chu March 29, 2020 zan khan lakluh ve leh an ni. Heng Mizoram-a lakluh tak te ram 2 ten Gate an khar avangin ramri-a Leilawn-ah an tang a, Zokhawthar-a Medical Screening Team ten an hriselna dinhmun uluk taka an enfiah hnuah Champhai District chhunga Quarantine  Centre tura ruat, Zokhawthar Land Custom Station leh District Panchayat Resources Centre (DPRC), Keifangtlang-ah te dah an ni.

Damdawi In tanpuina hlan
Human Resources Development Board Chairman leh Lengteng bialtu MLA, L. Thang-mawia chuan nimin khan a bial chhunga damdawi In 4-ah MLA Fund atangin tanpuina a sem a, Ngopa CHC-ah Rs. 20,000/- hlanin Mimbung, NE Khawdungsei leh Kawlkulh PHC-ah Rs. 15,000/- theuh hlanin heng te hi Ngopa SDO (Civil) kaltlangin a hlan a, tanpuina sumfai hi tunlai hrileng COVID-19 avanga thawktute, State dang leh ramdang atanga lo haw leh khualzin hriselna endiktu Damdawi In-a thawktuten a tul apianga an hman tura tih a ni.

Mi bo zawn tihtawp a ni
March 22, 2020 zan atanga chin hriatloh a bo, Panthangi (41), Bungzung chu Mizo Dan-a khawtlang huap-a ni 7 zawn a nih hnuah hmuh a ni lo a, khawtlang huap-a zawn hna chu nimin khan tihtawp a ni. Thudawn danin Panthangi hi fanu pakhat nei niin rilru lama harsatna nei a ni bawk a, tunhnaia COVID-19 thuthang velah hian harsatna tawkin March 22 khan an In atanga chhuakin chin hriatloh in a awm zui a, khawtlang huap-a ni 7 an zawn hnuah pawh a sulhnu hmuh awm lovin nimin khan khawtlang huapa zawn hna hi tihtawp a ni ta a ni.

COVID-19 vei 1071 ni tawh
Nimin tlai dar 4:00 thleng khan India ramah COVID-19 vei mi 1071 hmuhchhuah an ni tawh a, mi 102 te chu enkawl dam ni tawhin nunna chan mi 29 an awm tawh bawk a, darkar 24 chhungin hri vei hmuhchhuah thar 92 an awm a ni.

Nuai 23 chuang lut tawh
Mizoram-a COVID-19 leng mek dona atana a tul anga hman turin nimin tlai thleng khan Chief Minister’s Relief Fund kaltlangin  pawl leh mimal 23 ten Rs. 23,15,500/- an thawhkhawm tawh.

Comments

Chhiar Hlawhte