MZP in ramri chungchangah sawrkar hmalak tumna a tak ram chang tawh se an duh thu an sawi

MZP General Hqrs. hruaitute chuan Ram humhalh nana Bairabi Zophai-a Zofate Chawlhbuk sak tum a nih tirh atanga kawng hrang hranga an hmalakna leh sawrkarin hmalak tuma a insawina te chu a tak ram chang tawh se an duh thu sawiin, Mizoram sawrkar in a din, Core Committee chu an ring zo tawhlo tih an sawi.

Nimin-a Aizawl Press Club-a thuthar thehdarhtute an kawmna ah MZP General Hqrs. hruaitute chuan kan pi leh pu te luahchin ram humhalh a nih theih nan MZP chuan nasa taka hma an lak thin thu sawiin, ramri chungchanga sawrkarin a din, Core Committee in MZP te ramri chungchang ah document pawimawh zirchiang tura an tihna chu Mizoram sawrkarah an thlen tawh tih an sawi a. Heti chunga Vawiin thlenga hmalakna lawmawm hriat tur a awm zui lo hi hriatthiam harsa an ti tih sawiin, “Sawrkar hian Core Commitee hi a hming chauha a din leh hmala tak tak tur ni si lo a, inphenna atan chauha a dinah kan ngai tawh a ni,” an ti a. Tunah hian Assam lam chuan inremna ngai pawimawh lo vin Mosolman Biak In an lo sa leh tawh tih sawiin, “Inremna siam pawh zah lova hmalakna awm thin hi MZP chuan a hrethiam lo a, a tul anga che chhuak leh turin kan inpeih reng a ni,” an ti.

MZP hruaitute chuan Bairabi, Zophai hmuna Mizoram Chief Minister hmasa ber Pu Ch. Chhunga (L) leilet-a MZP in Zofate Chawlhbuk a lo sak tawh, Assam Police leh Assam Forest Department ten an thiah theih lai leh a hnu a sak tuma kal zirlaite leh Media mite nasa taka vuak leh silai a kah hial an tawh chung pawh a chhantu leh thlavang hauhtu pawh an neih loh lai leh Mizoram sawrkar hmalakna ngaihchan a nih mek laia Zophai Area-a Mosolman Biak In sak hun rei tak chawlhsan tawh tunhnaiah hmathar lak a ni leh ta mai chu hriatthiam a harin pawi kan ti hle tih an sawi.

Kum 2018-a Zophai Bairabi hmun a MZP te hmalakna avang khan Central sawrkar kaih-hruaina hnuaiah Satyendra Garg, Joint Secretary Ministry of Home Affairs hova Join Meeting neih thin a nih thu leh ramri enfiahtu tur Joint Verification Team Mizoram leh Assam aiawh awmna din niin, Inner Line Reserve Forest Area 509 Sq. miles chhunga dan lo a awm Building leh huan leh ramte enfiah nise tih a ni tih MZP hruaitute chuan an sawi a. Hmun engemaw zat enfiah a nih hnuah thu inhmu lo a awm tak vangin Meeting mumal neih zui theih a ni ta lo a. Central Sawrkar hotute chuan Mizoram Team lam chu ‘In sawrkar hotute nen in ram chin-a in pawm han sawifel ula, min lo hrilh leh anga, kan inbe leh dawn nia,’ an ti ta a ni, an ti. Hemi a nih avang hian Mizoram leh Assam ramri chungchanga inbiakna chu Mizo-ram Sawrkar kutah a tang ta tih an sawi.

MZP hruaitute chuan tuna MNF Ministry-ah pawh sawrkar thuneitu, Minister te chu vawi tam tak helai ramri chungchang hi an sawipui tawh thu sawiin, Core Committee pawh din thar niin Meeting an neih bakah chanvo pawh insem a nih thu an sawi a. MZP te chu Mizoram - Assam ramri kaihhnawih documents zawng zawng lo lakhawm a thehlut tura tih an nih angin April ni 16, 2019 khan Core Committee Chairman hnenah thehluh a ni tawh tih an sawi a. “Kan thehluh atang khan hmalakna engmah hmuh tur a awm zui ta lo a. MZP chuan ramri chungchang ngaihtuahtu tura a din ‘Core Committee’ chu a ring zo tawh lo a ni,” an ti bawk.

MZP chuan kan ram chi humhalh turin hma an la chhunzawm dawn tih pawh sawiin, sawrkar thuneitute pawh ram venhimna kawngah chak zawka hma laa tun aia ramri ngaihvena, vei chhunzawm tura an phut thu an sawi bawk a. Kan ramri chinfel a nih a ramri ah buaina a awm fo lohna turin Zophai bul Baibawn tlang-ah Police Outpost dah thuai turia sawrkar ngen nawn lehin, thenawm State laka a dawi zawka tan reng ngai lo tura inbuatsaih an duh thu an sawi bawk.