Serchhip District chhunga Village Council 54 leh Sub-Village pakhat a awm dawn niin a lang

Village Council inthlanpui lo awm turah Serchhip District pumah Village Council (VC) 54 awm tura ngaih a ni a, VC thar pakhat erawh a piang leh mai thei nia thudawn niin thutlukna erawh siam ala ni lo thung.
Mizoram-a Village Council inthlanpui neih a nih dawn hnaih avangin VC siam thar leh a ramri siamthat hna te thawh mek zel a ni a, thudawnna thar ber leh tunhnaia Village Council inthlanpui neih tur atana Electoral Roll siamthar hna thawhna tura Draft Roll tarchhuah takah chuan Serchhip District chhungah VC hi 54 a awm dawn niin a lang a, Serchhip Constituency-ah VC 20 awmin Tuikum Constituency-ah VC 18 leh Hrangturzo Constituency-ah VC 16 awm tura ngaih a ni a. Serchhip Constituency-ah hian VC awmsa te bakah Serchhip-II VC atangin Darnam VC thar a piang dawn a, Serchhip-VIII VC atangin Serchhip Chanmari VC a piang anga, heng VC thar siamna tur atan hian sawrkar chuan Notification pawh a tichhuak fel tawh a. Heng bakah hian Kanghmun South leh Zote South VC te chu Serchhip Bial-ah hian an tel tawh dawn bawk a ni.
Tuikum Constituency-a VC 18 awm turah hian Chhiahtlang VC chu VC pahnih ah then niin Chhiahtlang North leh Chhiahtlang South VC tih a ni tawh dawn a, Chhiahtlang VC hnuaia Sub-Village ni thin, Vanchengte chuan VC thar an nei dawn bawk a. he Constituency huamchhung ah hian Sub-Village pakhat awmin, Baktawng Vengpui VC hnuaiah Buhkangkawn Sub-Village a awm dawn bawk a ni. Tuikum Constituency huamchhunga Phulmawi, Tlungvel leh Darlawng VC te chu Serchhip District hnuaiah an awm dawn lo thung a ni.
Hrangturzo Constituency hnuaiah hian tun dinhmun ah VC 16 awm tura ruahman mek a ni a, North Vanlaiphai VC chu VC pahnih-ah then turin ruahmanna thui tak kalpui ni tawh mah se a ramri tur tihfel theih ala nih loh avangin VC pakhat angin la kalpui tura ngaih a ni a, amah-erawh chu Zirtawpni zan khan a ramri tur chungchang hi sawihona neih leh niin ruahmanna felfai hi siam theih beisei a ni a, amaherawh chu sawrkar lam atangin VC then tura Notification tihchhuah erawh ala awm theilo thung a ni. Hrangturzo bial-a awm thin Biate chu VC inthlanna ah hian Serchhip District hnuaiah a awmlo thung a ni. Tun dinhmuna a lan danin Serchhip District chhungah hian Thenzawl East chu VC mal-a Vote nei thei tamna ber niin Vote nei thei 3178 an awm a, Vanchengte VC-ah Vote nei thei tlem berin Voters 85 an awm dawn a ni.

Comments

Chhiar Hlawhte