Bairabi Zophai hmuna Biak In sak chhunzawm MZP in chhunzawm tawhlo turin a hriattir

Bairabi Zophai hmun-a dan lova Mosolman Biak In sak, hun rei tak an chawlhsan tawh chu tunhnaiah hmathar lak leh a nih avangin nimin khan MZP hruaitute chuan tlawhin helai hmuna hna thawka awm te chu sa chhunzawm tawhlo turin an hriattir a. A tul anga che chhuak turin an inring reng tih an sawi bawk.

Mizo Zirlai Pawl (MZP) chuan Bairabi, Zophai hmuna dan lova Mosolman Biak In sak, hun rei tak an chawlhsan tawh chu tunhnaiah hmathar lak a ni tih hriain, hei hi an hrethiam lo hle tih an sawi a. Hei vang hian nimin khan MZP General Hqrs.-a General Secretary, Lalnunmawia Pautu hovin MZP Hqrs. Kolasib leh MZP Sub-Hqrs. Bairabi hruaituten an enfiah a. Hmathar an la ngei a ni tih hriat a nih avangin leh Slab chhun tuma a dona tur an lo siam thar chu tha ti lovin an thiah sak a. Biak In hi sa chhunzawm tawh lo tura hrilh nghalin, an tilui anih chuan helai venghim tur hian MZP chuan tih hreh engmah a nei dawn loh thu leh kan ram humhim tur leh a tul ang a che chhuak turin MZP chu engtiklai pawhin a inralring reng tih an sawi bawk.
MZP chuan Mizoram Police te awm lai renga Assam lamin hmathar la a hna an thawk thin chu mak a ti hle tih sawiin, helai hmuna Mizoram Police duty te pawh hna chhunzawm tumna a awm anih chuan lo dang ve tawh turin a ngen nghal a, Mizoram sawrkar thuneitute pawh ram venhimna kawngah chak zawka hma la a tun aia ramri ngaihvena, vei chhunzawm tura an phut thu an sawi bawk.
Hetihlai hian MZP General Hqrs. hruaitute chuan nimin khan Labour Employment, Skill Development & Enterpreneurship Minister, Lalchhandama Ralte chu a Office-ah hmuin Mizo thalai hna nei lo ten Skill Development Training mumal tak neia, eizawnna rintlak an neih theih nan hmalak ho dan tur an sawipui a. Minister chuan, Mizo thalai ten eizawnna ngelnghet an neih theih nana, Department hmalakna hrang hrang te lo hrilhin, chak zawk a hmalak an tum dan te leh MZP nen a thawhho a duh thu a lo hrilh a ni.
MZP chuan Mizoram sawrkar enkawl sikul ten hma an sawn theih nana rawtna an neih hrang hrang te Minister hi sawipuiin, Minister pawhin theihtawp chhuaha MZP rawtna hrang hrang te lo ngaihpawimawh a tum thu leh zirna in hma a sawn theih nana hmalak tum dan te a lo hrilh a. MZP chuan nu leh pa tam zawk ten an fate luhtirna tlaka sawrkar sikul te an ngaih leh theih nan a tul anga hma la tura sawrkar chu ngenin, a tul anga sawrkar tanpui turin MZP chu a inhuam thu an sawi a, a tul anga zirna siamthat kawngah thawhho zel nise an ti bawk.

Comments

Chhiar Hlawhte