COVID-19 avanga inkharkhipna neih mekah mipuite mamawh phuhruk dan tur ngaihtuah a ni

Mizoram Chief Secretary hova sawrkar hotu pawimawh thukhawmte chuan Covid-19 hrileng vanga inkharkhip hun chhunga mipui nitin mamawh phuhrukna atana hmalakna hrang hrang thlirin ruahmanna an siam a. COVID-19 chungchanga hmalakna hrang hrangah lawmthu an sawi bawk.

Inrinni khan Chief Secretary Conference Hall, MINECO Aizawl-ah Chief Secretary, Lalnunmawia Chuaungo leh Additional Chief Secretary, JC. Ramthanga te hovin Sawrkar hotulu pawimawh ten COVID-19 hrileng avanga kharkhipna kalpui mekah nitin mamawh phuhruk tura hmalakna te thlirhovin, harsatna hrang hrang te sukiang turin ruahmanna leh rawtna te an sawiho a. He hunah hian mipui nitin mamawh bungraw semdarh (Bazar leh Supply Management) chungchang te, Aizawl khawpui chhunga bawlhhlawh paih chungchang te leh ran chaw leh damdawi dawr inhawn chungchang te sawiin, harsatna an tawh te an sawiho a. Sawrkar in theirah leh thlai thar semdarhna tur ruahmanna a siam chu a khaihlak loh nana hmalakna te sawikhawm niin he ruahmanna hi tluang taka a kal theih nana Horticulture leh Commerce & Industries Department leh MIZOFED thawhho dan leh Local Level Task Force nen a an thawhho dan te sawilan a ni a. Nitin mamawh phurtu ten awlsam zawka bungrua an chawkluh nan awlsam zawka phalna pekchhuah dan leh Mizoram Distributors' Association (MIDA) ten bungrua an semdarh theih nana rawtna an siam te pawh sawiho niin heng an rawtna te hi bawhzui nise an ti a.Task Force on Commodities hnathawh te thlirhovin rang zawka mamawh hrang hrang phurhna tur dilna awlsam zawka tihdan te pawh sawiho a ni bawk.

Sawrkar hotute chuan COVID-19 dona kawnga Kohhran hmalakna te, LLTF/VLTF te thahnemngaihna leh inpekna te, Department hrang hrang thawhhona te leh mipuiin thu awih taka Sawrkar ruahmanna leh kaihhruaina an zawm chu ropui an tih thu leh lawmawm an tih thu sawiin, he natna a darh zel loh nan Sawrkar thu leh hla te chu zawm zel turin mipui an ngen bawk a. Mizo-ram-a COVID-19 vei tuna enkawl mekin thlawhnaa a chuanpui mi 140 te chu Police in an chhui zui thu leh contact tracing ngawrh taka an tih thu Police hotu ten an tarlang a. Mizo zirlai leh zin mi, Mizoram pawna tangkhang chungchangah Mizo-ram House te chu chutianga Mizo awmte tanpui tura hriattir an nih tawh thu an sawi bawk.