Chief Minister in mipuite hnenah thuchah sawi

Chief Minister Zoramthanga chuan Hripui hlauhawm tak Corona Virus, Mizoram in lo su ve turin kawng tinrengin an inbuatsaih a, a pawimawh ber chu khauh taka hmalak a ni a, hei hian tihsual a veng a ni a ti.

Chief Minister hian radio leh TV kaltlangin mipui hnenah thuchah a sawina ah he thu hi sawiin, mipuite himna atana sawrkar hmalakna ah CRPC Sec 144-na hmanga awmkhawm phal lohna puan hial a ni tawh tih sawiin, sawrkar pawh inkokhawm lo turin a in ruahman a, Task Force hrang hrangah political party leh NGO te tel ni se ti a rawtna te pawh a awm chungin, MLA ringawt inkawhkhawm pawh thil tih chi a ni tawh lova, rawtna leh thurawn hrang hrang te chu a tam thei ang bera telephone hmanga siam ni se, hemi atan hian sawrkar pawh a inhawng reng a ni, a ti.
He Coronavirus bei tur hian India sawrkar a chet hma in, Mizoram chu a lo che hman tawh tih sawiin Chief Minister chuan, hemi avang hian harsatna pawh an tawk ngei a, amaherawhchu sut kuak theih loh khawp a harsatna lian a la thleng lo a ni, a ti a. Mizoram pawna Mizote himna an ngaihven reng tih sawiin, Mizoram House hrang hrang a be pawp tawh a, harsatna tawk an awm loh thu leh Kolkata-ah chuan mi 14 vel an tangkang thu hrilh a ni a, heng mite pawh hi a tul angin DRC leh RC ten an buaipui dawn tih an hrilh niin a sawi a. Lok Sabha MP C Lalrosanga pawhin theihtawp a chhuah a, phai lama tangkang te a ngaihven reng tih sawiin, Rajya Sabha MP, Ronald Sapa Tlau pawhin theihtawp a chhuah zui zel a ni, a ti bawk.
Chief Minister chuan State chhung hmun hrang hranga thlai chhe mai tur te lak a semchhuah dan tur ngaihtuah mek a ni tih pawh sawiin, State Level Task Force hnuaiah Supply Committee din mek a ni a, buhfai sem darh dan tur te, thlai leh chehmeh leh ration supply te, phai lam atanga lo kal te, Mizoram chhunga zikhlum, antam leh thildang lakkhawm theihloha awm mek, lakkhawm dan tur leh mipuiin an lei theih dan tur ruahman chu hna pakhatah an nei dawn a ti.
Tun dinhmuna hmanraw pui ber Local Task Force an ni a, nitin mamawh lei thu ah remruatna an siam thei a, anni hian wholesale naa lak tur emaw, mahni veng leh khaw chhunga zawrh chhawn tur lakna kawngah in chuh buai leh in chim huk turin remruatna an siam ang, a ti a. Task Force hrang hrang te lawmthu hrilhin, Local, District leh State Level Task Force te tan tawngtai sak turin mipuite a sawm bawk.

Comments

Chhiar Hlawhte