Latest News

MZP leh ZORO in Manipur-a Kuki khua hal an dem thu leh hriatthiam har an tih thu an sawi

Mizo Zirlai Pawl (MZP) Office Bearers Meeting chuan tunkar Thawhtanni-a kan unau, Kuki, Komjang District, Chassad Manipur-a chengte nasa taka nghaisak an ni leh an khua hial hal sak a ni chu a hrethiam lo hle tih sawiin, ZORO General Hqrs. pawhin he thil thleng hi pawi an tih thu leh hriatthiam har an tih thu an sawi bawk.

MZP General Hqrs. hian tunkar Thawhtanni khan OB Meeting neiin kan unau Kuki, Komjang District, Chassad Manipur-a chengte nasa taka nghaisak an ni leh an khua hial hal sak a ni chu an hrethiam lo hle tih sawiin, In leh lo inhalsakna mai piah lamah tharum thawhna a thleng leh kan unau pawisawilo te tawrhna chu pawi an tih thu sawiin, Manipur Police SP leh Assam Rifles te awm reng laia hetianga tharum thawhna a thleng hi an dem takzet tih an sawi a. India ram chhung State thenkhatah Hnam tenau zawkte an himlo fo leh sawrkar pawhin an thlavang a hauh tha tawk lo fo chu pawi an ti takzet tih pawh sawiin, India ramchhungah hian Hnam hrang hrang te inlungrual taka kan khawsak ho zel theihna turin Manipur State thuneitute chu chak taka hma la turin an ngen tih an sawi a, pawikhawihtute hmetmit-a an phutawk hremna pe ngei tur leh Kuki te himna tur ngaihtuaha In leh lo chan te zangnadawmna pe tura an phut thu sawiin, “Heng thil thleng hi MZP chuan uluk takin a thlir reng a, a tul anga tanpui tur leh hma la turin MZP chu a inhuam reng a. Kan unau khawi hmuna cheng te tan pawh MZP chu a ding reng dawn a ni,” an ti.
Hetihlai hian ZORO General Hqrs. pawhin nimin khan Aizawl-a an Office-ah Emergency Meeting neiin kan unau Kuki khua, Chahsat Manipur State a mi NSCM-IM mi leh sa te leh Tangkhul Naga mi leh sa ten an hal sak pawi an tih thu leh hriatthiam har an ti hle tih sawiin, thinlung taka an tawrhpui thu an sawi a. Hetianga Kuki pawi sawilo khua halna ah hian a mawhphurtu leh a meizang hlaptu thahnem tak an awm ngeiin an ring tih sawiin, Chhasat haltu te hi a rang lamin Sawrkar in man chhuakin an phu tawk hremna pe ngei tura thuneitute an phut thu an sawi a. Sawrkar thuneitute pawh he thil tuartute zangnadawmna a rang thei ang bera pe tura an phut thu an sawi.
ZORO chuan an unau Kuki khaw hal tuarte hi an hre reng tih pawh sawiin, an thlavang hauh a penchhuah a ngai a nih chuan an in huamin an inpeih reng tih an sawi a. ZORO chu khawvel hmun hrang hranga awm Zofate tana ding a nih angin an unau ten harsatna an nei a nih chuan an thlavang hauh turin ke an pen zel dawn tih an sawi bawk.

Comments

Popular News (Last 30 Days)