Chanchinthar thenkhat :

Khamrang Solar Plant hawng

Rural Development Minister, Lalruatkima chuan nimin zing khan Khamrang khaw chawmtu tur Solar Plant siam thar chu a hawng a, he Solar Plant hi MIMIR Project hnuaia inelna siam atanga Khamrang VC ten lawmman pakhatna an dawn hmanga cheng nuai 100 senga siam a ni a. Chhung-kaw 212 ten LED Bulb 2 theuh an chhi thei dawn a ni. A siam hna hi Agni Power & Electronics ten thawkin, Wiring leh Fitting hi Khelte Enterprise ten an thawk a ni.

BJP in hmalakna chawlhsan

BJP Mizoram Pradesh President, Vanlal-hmuaka chuan nimin khan Aizawl-ah an party Office-ah thuthar thehdarhtute kawmin Covid-19 laka kan ram leh hnam a lo him zawk theih nan Mizoram chhunga party anga an chet lakna zawng zawng Unit Committee, Block Committee, District Committee leh State Office thlengin State Office atanga thuchhuah dang siam a nih hma chu chawlhsan vek turin a hriattir a. BJP Workers te chu an awmna hmunah theuh ah Covid-19 hri leng mek dona kawngah a tulna apiangah in volunteer thei tura inralring vek tur a hriattir bawk.

MPCC in sawrkar thlawp

Mizoram Pradesh Congress Committee (MP-CC) Communication Department chuan Covid-19 laka kan him tlan theihna tur leh kan invenna tura sawrkar hmalakna reng reng theihtawp chhuahin an tawiawm zel dawn tih nimin khan thuchhuah siamin an tarlang a. India ram hi Covid-19 vei leh vei lo enchhinna (test) ratio-ah kan hniam hle tih tarlangin, chutih rualin keini State chu a Test-na facility neilo kan la ni lehzel tih sawiin, hei vang hian fimkhur zual kan ngai hle tih sawiin, mipuite pawh sawrkar thu zawm hram hram turin an ngen a, mipuite hriat chin tur thupuan chhuah kawngah thudik leh rintlak puang turin sawrkar an ngen bawk.

Quarantine Centre leh Isolation Centre tur enfiah

Tunlai-a hrileng mek, Coronavirus laka inven lawkna kalzelah nimin khan India leh Myanmar inkalpawhna hmunpui ber Zokhawthar chu Cham-phai District Official-te’n tlawhin, India rama rawn haw te enthlaka dah lailawkna tur, Quarantine Centre leh rinhlelh an awm thulh pawha dah hranna tur Isolation Centre buatsaih dan turte enfiah a ni a. Zokhawthar khuaa hmunhma hrang hrangte enfiah niin, Myanmar kaltlanga India mi rawn haw turte ni 14 chhung enthlaka dah lailawkna hmun tur atan Land Customs Station, Hotel Paradise, Zokhawthar English Medium School (ZEMS), Zokhawthar Higher Secondary School leh Zokhawthar YMA Hall-te chu tlawha zirchian a ni a, zirchianna te hi thuneitu sang zawkah thlena hman tur ber tihchian veleh cheibawl nghal tur a ni.

Heng bakah hian ramri kana rawn haw Medical Screening tih hnua rinhleh palh an awm thulh pawha dah hran nghalna hmun, Isolation Centre tura State sawrkarin a ruat Zokhawthar Tourist Lodge chu tlawha hmunhma te enfiah a ni a, a ranglama cheibawl nghal tura tih a ni bawk.