Tripura-a awm turte dawn tur ang zat dawn phut

Sawrkar laipui thu awiha Tripura Relief Camp atanga Mizoram a lokir Bru chhungkaw 1,900 chuang aiawhte chuan Tripura-a awm hlen turte dawn ang zat dawn ve an phut mek.

Bru lokirte aiawha ding, Equal Package Demand Committee (EPDC) Chairman, Elvis Chorkhy chuan Mizoram-a lokir chhungkaw 1,900 chuangte hi kum 2010 leh 2018 inkar chhunga sawrkarin kirna hun vawi 8 a ruahman chhunga lokir an nih thu a sawi a. Anni hian chhungkaw pakhatin Rs. 80,000/- chauh an dawn laiin an hnu a lokirte chuan July 3, 2018-a sawrkar laipui, Mizoram leh Tripura sawrkar leh Relief Camp-a Bru aiawhte inremna angin a thlawna Ration an dawn bakah cheng Rs. 6,70,000/- an dawng bik dawn a ni, a ti a. Sawrkar thuawih a lokirte'n cheng nuai 6 dawna an dawng tlem hi thil dik a nih theih loh thu leh nakin hun lokal zel atana entawn tur tha lo a siam a hlauhawm thu Elvis Chorkhy chuan a sawi a. Sawrkar thu awih lotute chan a that zawk chuan Bru mite chunga thleng ang hi hnamdang chunga a thlen hunah sawrkar tan a la pawi thei a a hriat thu a sawi a. Hemi chungchangah hian EPDC hruaitute hian Zirtawpni khan Mizoram Larsap, PS. Sreedharan Pillai pawh Aizawl Raj Bhavan-ah an hmuh thu a sawi a ni.

EPDC hruaitute chuan an thil ngiat hi sawrkar laipui-ah leh Mizoram sawrkar ah pawh vawi duailo an thehluh tawh thu an sawi a. Tunhnaiah pawh khan Ministry of Home Affairs-a hmarchhak changtu Joint Secretary, Satyendra Garg hnenah lehkha an thehlut leh tawh a. Chief Minister pawh hmuh thuai an tum thu an sawi. August ni 10, 2018-a Tripura a Dhamcherra khua a Joint Monitoring Group on Bru Repatriation thutkhawmna ah an chungchang hi sawiho a ni thu leh, an thurel chhinchhiahna a 5-na ah chuan Mizorama kir tawhte'n la kir rihlo te dawn zat ang an dawn tur chungchang chu hruaikir leh tura ruahmanna a zawhfel huna ngaihtuah tura dah a ni, an ti bawk.