Naktuk-a Mipui Curfew neih tur zawm vek turin Larsap in mipuite a sawm

Mizoram Governor, PS. Sreedharan Pillai chuan Covid-19 leng mek avangin Mizoram mipuite chu chiai lo turin a chah a, naktuk (March 22, 2020)-a neih tura Prime Minister thupuan, 'Mipui Curfew' chu tha taka zawm vek turin mipuite chu a sawm bawk.

Mizoram Governor, PS. Sreedharan Pillai hian nimin khan Aizawl-ah thuthar thehdarhtute kawmin Prime Minister in rampum huap-a Curfew, Janata Curfew a puan chungchangah mipuite chu sawrkar thlawp turin a ngen a, Governor chuan khawvelin Coronavirus avangin harsatna liantham tak a tawk mek tih sawiin, “Hlauhthawn tur leh chi-aina tur a nih loh laiin inthlahdah erawh chu a thiang hauh lo thung,” tiin he kan hun harsa kan tawng mekah hian nizan hmasa lama Prime Minister in ngenna a siam chu tih hlawhtlin nise a duh thu a sawi a. “Kan hriat tawh angin Prime Minister chuan tun Pathianni lo awm turah zinglam dar 7:00 atanga zan dar 9:00 inkarah mipui te pawna chhuak lo turin min ngen a nih kha. Hemi hun chhung bikah hian khua leh tui te zawng zawng te chu kan In lum chhuahsan lo tur leh khawlai leh kawthler-ah te chhuak miah lo turin kan in ngen a ni,” a ti a. Tun hi kan zavaia tanruala hun leh kan hmaa chona lian tak, thukhat vuaa kan hmachhawn hun a ni ti sawiin, “Kohhran, Tlawmngai pawl te leh Pathian tihtute theihtawpa he hrileng laka kan himna tura hmalatu zawng hnenah lawmthu ka sawi rualin an hnathawh pawimawh tak hi chhunzawm zel turin ka chah a. Mizoram mipui tana rawngbawlna hi Pathian rawng kan bawlna a ni tih i hre thar leh ang u,” a ti.

Governor chuan Pathianni-ah In-a inkhung vek tur leh tlai dar 5:00-ah khua leh tui zawng zawngte chuan kan tana an nunna thapa thawktute zahna lantirin awmhmun ah emaw, kan tukverh-ah emaw te ri thei te khawng ri a, kut te beng turin a sawm bawk.

Larsap chuan he chonna hmachhawn tur hian Central leh State sawrkar an inpuahchah tha tawk tih sawiin, “Ei leh bar bakah nitina mipui mamawhte pawh kan kham khawp a awm reng dawn a. Heng thil pawimawh bik chawk-luh hi a chatlak dawn lo a ni,” a ti a. Khua leh tui zawng zawngte chu tha taka Central leh State Sawrkar thlawp tlat tur leh he hrileng danchah a nih theihna tura hmalakna reng reng chu zawm tlat tura chahin, “Mizoram hi hmun him ber ni reng se, a chhunga cheng mipuite pawhin hriselna tha nei zel se tih hi ka tawngtaina a ni,” a ti bawk.