COVID-19 avanga harsatna thlenga Mizoram-a hmalakna hrang hrangah MNF party an lawm

Mizo National Front (MNF) General Hqrs. chuan COVID-19 avanga khawvel in hun harsa leh khirh tak a tawh mek lai a Zonun ze mawi leh Kristianna parchhuak lo lang mek zel chu lawmawm an tih thu an sawi.

Nimin a thuchhuah an siamah MNF General Hqrs. chuan hun harsa leh khirh tak Zoram paltlangpui tura Pathian-in a hunchhuah, sawrkar hmalakna hrang hrang te chu ropui an tih thu leh thlamuanthlak an tih thu tarlangin, Chief Minister ruahmanna anga a tul tula hman tur cheng nuai 500 sanction nghal mai a ni leh thil pawimawhah sawrkar laipui-a hruaitute a dawr fel zung zung te chu pa chan a chang zo takzet tih an sawi a. Health Minister Dr. R. Lalthangliana inpekna leh hnathawh chu chhuanawm an tih thu pawh tarlangin, “Anmahni Department chanpual theuhah Minister zawng zawngin mut mawh hnar mawha neiin Zoram mipuite tan nasa takin an thawk tak zet a. MLA leh MP-te inpekna pawh a chhuanawm takzet a ni,” an ti.

Hei bakah hian MNF party chuan Covid 19 beia ral hmatawngte inthuamna tur, Personal Protection Equiptment (PPE) 10,900 leh Medical lam hmanrua thahnem tak Thlawhna hranpa, Special Cargo-a rawn phurhluh a ni te, Zoram Medical College (ZMC) Covid 19 veite enkawlna tura hman a nih avanga Aizawl Civil Hospital thuam changtlunna tura ICU khum 18 siam belhna tur leh, hmanraw dang motor liana phurhluh mek a ni te chu lawmawm an tih thu sawiin, “Kan Medical College ala changtlung tawk lo hle chunga MZU khawl neihsa nena tangkawp a, Coronovirus test-na tur khawl hman tan mai theih tura peihfel mek a ni te hi a ropui tak zet a ni,” an ti a, a pawimawh lai tur apiangah inrelbawlna felfai zawka a kal zung zung theih nana nihna leh chanvo bakah ngaihtuahtu tur ruatfel thuai thuai a ni te chu chhuanawm an tih thu an tarlang bawk.

LESDE Department sum hmanga miharsa zawkte tan cheng nuai 251 man a thlawna buhfai sem mek a ni te, Mizoram Building & Other Construction Workers Welfare Board Chairman, Lalchhandama Ralte hmalaknaa kuthnathawktu Workers Welfare member mi 50,000 zette Rs.3000/- (cheng sangthum) pek mai tura rel fel a ni leh ei leh bara harsatna kan tawh loh nana buhfai leh nitin mamawh chawkluh a nih mek zelna tura Supply Minister, K. Lalrinliana hova he Department hmalakna te chu ropui an tih thu pawh tarlangin, Thingtlang lam mite harsatna tawh hre renga ni 100 inhlawhna rang taka kalpui a nih theih nana RD Minister, Lalruatkima hmalakna te pawh lawmawm an tih thu an sawi a. He hun harsaa Zoram tana hnathawktu zawng zawng - Medical lam thawktu te, damlo enkawl tura inpe (in-volunteer) bikte leh thupek kengkawha ni chhun zana thawktu Police leh Force te, NGO zawng zawng te, Local Level Task Force te, Office lama tul taka la thawk mek reng te, Zoram mamawh phurtu Driver te, Tui sem leh Power lama thawk te, Media-a thawktu te leh he hun thima Pathian autu Kohhran mite chungah lawmthu an sawi a. Sum leh pai thawhtu mimal leh pawl zawng zawngte bakah sorkar thuawih a, he natna laka himna atana mahni In-a tawm tlat te chungah lawmthu an sawi tih an tarlang bawk.